استانادا 7 مامىر كۇنى ساعات 11:00-دە وتان قورعاۋشىلار كۇنىنە جانە ۇلى وتان سوعىسىنداعى جەڭىستىڭ 80 جىلدىعىنا وراي اۋقىمدى اسكەري شەرۋ وتەدى،- دەپ حابارلايدى Dalanews.kz
شەرۋ وتەتىن جەردە قاۋىپسىزدىك پەن باقىلاۋ شارالارى كۇشەيتىلەدى. وعان ۇلى وتان سوعىسىنىڭ ارداگەرلەرى، تىل ەڭبەككەرلەرى، اسكەري ءىس-قيمىلداردىڭ ارداگەرلەرى، ق ر قارۋلى كۇشتەرىنىڭ ۇزدىك بولىمشەلەرى، قۇرمەت قاراۋىل روتالارى، ق ر قارۋلى كۇشتەرىنىڭ، وزگە دە اسكەرلەر مەن اسكەري قۇرالىمداردىڭ، اسكەري قۇقىق قورعاۋ ورگاندارىنىڭ جانە ت.ب. ارداگەرلەرى شاقىرىلدى.
ەلوردادا 7 مامىر كۇنى مەرەكە قۇرمەتىنە كونسەرتتەر مەن اسكەري شەرۋدىڭ تىكەلەي ەفيرى وتەدى. ساعات 11:00-دەن باستاپ ۇلكەن LED ەكرانداردا شەرۋ بىردەن بىرنەشە ورىندا كورسەتىلەدى:
- ەلوردا اكىمدىگى عيماراتىنىڭ جانىنداعى قالالىق الاڭدا (تىكەلەي ەفير جانە مەرەكەلىك كونسەرت)؛
- «استانا ارەنا» ستاديونىنىڭ اۋماعىندا (تىكەلەي ەفير جانە مەرەكەلىك كونسەرت)؛
- «Astana Music Hall» اۆتوتۇراق اۋماعى (قۇمىرا) ب.مومىش ۇلى داڭعىلى، 1 (تەك تىكەلەي ترانسلياسيا).
سونىمەن قاتار، ءىس-شارا رەسپۋبليكالىق تەلەارنالاردىڭ تىكەلەي ەفيرىندە كورسەتىلەدى.
مىنا جايتتارعا نازار اۋدارۋ قاجەت:
- شەرۋ وتەتىن اۋداندا كولىك قوزعالىسى شەكتەلەدى.
- قوزعالىس باعىتىڭىزدى الدىن الا جوسپارلاۋدى جانە وزگەرىستەردى ەسكەرۋدى سۇرايمىز.
- قۇقىق قورعاۋ ورگاندارى قىزمەتكەرلەرىنىڭ قاۋىپسىزدىك ەرەجەلەرى مەن نۇسقاۋلارىن ساقتاۋدى سۇرايمىز.
- كورسەتىلگەن ۋچاسكەلەردەن ءوتۋ جانە جول ءجۇرۋ بارلىق ءىس-شارا اياقتالعاننان كەيىن قايتا جاندانادى.
