اۆياسيا – بۇل تەحنولوگيانىڭ، دالدىكتىڭ جانە ادام ەڭبەگىنىڭ سينەرگياسى. ءاربىر ءساتتى ورىندالعان رەيس كوپ جاعدايدا كوزدەن تاسا بولىپ جاتادى. الايدا بۇل - مىڭداعان ماماننىڭ ۇيلەسىمدى جۇمىس ناتيجەسى ەكەنىن ەسكەرگەن ءجون. استانا حالىقارالىق اۋەجايى – ەلىمىزدىڭ اۋە قوزعالىسىنىڭ جۇرەگى، مۇندا قاۋىپسىزدىك، جايلىلىق جانە تيىمدىلىك ءبىرىنشى ورىندا. ەندەشە اۆياسيا كۇنى قارساڭىندا اتالعان اۋە قاتىناسىنىڭ سەنىمدىلىگى مەن قولايلىعىن قامتاماسىز ەتەتىن مامانداردىڭ ەڭبەگى، ناقتى دەرەكتەر مەن اۋەجايدىڭ دامۋ باعىتتارى تۋرالى ايتا كەتەيىك، دەپ حابارلايدى Dalanews.kz.

2000 مامان: تاۋلىك بويى جۇمىس ىستەيتىن ۇجىم

استانا حالىقارالىق اۋەجايىندا 2000-نان استام قىزمەتكەر اۋە قاۋىپسىزدىگىن قامتاماسىز ەتۋگە اتسالىسادى. اۆياسيالىق قاۋىپسىزدىك قىزمەتى تاۋلىك بويى اۋەجايداعى جاعدايدى قاداعالاپ، ءاربىر جۇكتى مۇقيات تەكسەرىپ، اۋە كەمەسىنە كىرۋ مۇمكىندىگىن ءقاۋىپسىز ەتەدى، كينولوگتار ىقتيمال قاۋىپتەردىڭ الدىن الادى. جەر ءۇستى قىزمەتتەرى اۋە كەمەلەرىن ۇشۋعا دايىنداپ، مۇزعا قارسى وڭدەۋ جۇرگىزەدى جانە اۋە كەمەسىنىڭ اۋاداعى تۇراقتىلىعىنا اسەر ەتەتىن باگاج بالانسىن باقىلايدى. ديسپەچەرلەر مەن رامپ-اگەنتتەر اۋە كەمەلەرىنىڭ جەردەگى ناقتى قوزعالىسىن قامتاماسىز ەتەدى، ال ءورت ءسوندىرۋ قىزمەتى توتەنشە جاعداي كەزىندە دەرەۋ ارەكەت ەتۋ ءۇشىن ءاردايىم دايىن.

2024 جىلى اۋەجاي ماماندارىنىڭ جۇمىسىنىڭ ارقاسىندا 107 تىيىم سالىنعان زات جانە تاسىمالداۋعا شەكتەۋ قويىلعان 27 552 زات انىقتالدى. كينولوگتار مەن قىزمەتتىك يتتەر قاۋىپ-قاتەردىڭ الدىن الاتىن جانە ۇشۋ قاۋىپسىزدىگىن قاتاڭ باقىلايتىن — «كوزگە تۇسپەيتىن» ناعىز ساقشىلار. ەلوردا اۋەجايىنىڭ ەرەكشە قاجەتتىلىكتەرى بار جولاۋشىلارى ءارقاشان نازاردا. بيىل استانا اۋەجايى مۇمكىندىگى شەكتەۋلى 31 019 جولاۋشىعا قىزمەت كورسەتىپ، ولاردىڭ جايلى ءارى كەدەرگىسىز قوزعالىسى ءۇشىن ەڭبەك ەتتى.

ايتارلىقتاي ءوسىم مەن جولاۋشىلار اعىنى

استانا حالىقارالىق اۋەجايىندا جولاۋشىلار سانى جىل سايىن ارتىپ كەلەدى. 2024 جىلى ەلوردا اۋەجايىندا 8 315 108 جولاۋشىعا قىزمەت كورسەتىلدى، بۇل وتكەن جىلمەن سالىستىرعاندا 11%-عا ارتىق كورسەتكىش. ىشكى اۋە قاتىناسى 9 پايىزعا، حالىقارالىق - 16 پايىزعا ءوستى.

• ىشكى اۋە تاسىمالى – 5 668 234 جولاۋشى (+9%).

• حالىقارالىق اۋە تاسىمالى – 2 646 874 جولاۋشى (+16%). 

ساياحاتتاۋ ىڭعايلى بولىپ، باعىتتاردىڭ سانى دا ارتا ءتۇستى.

اۋەجايدا رەيستەر جيىلىگىن ارتتىرۋ ءارى جاڭا باعىتتار سانىن كەڭەيتۋ بويىنشا بەلسەندى جۇمىس جۇرگىزىلۋدە. وتكەن جىلى ەۋروپاعا، تاياۋ شىعىسقا، وڭتۇستىك-شىعىس ازياعا جانە تمد ەلدەرىنە اۋە رەيستەرى قايتا جانداندى. الەمنىڭ ءىرى قالالارىنا، سونىڭ ىشىندە ابۋ-دابي، سەۋل، تبيليسي، پراگا، سانكت-پەتەربۋرگكە، سونداي-اق كامران، بودرۋم جانە پحۋكەت سياقتى تانىمال تۋريستىك باعىتتارعا ۇشۋ جيىلىگى ۇلعايتىلدى.

2024 جىلى العاش رەت دۋشانبە، فۋكۋوك، پحۋكەت جانە ميلان قالالارىنا رەيستەر اشىلدى.

بۇل ءوسىم قازاقستاننىڭ ترانزيتتىك الەۋەتىن دامىتۋعا، اۋەجايدىڭ حالىقارالىق حاب رەتىندەگى ۇستانىمىن نىعايتۋعا ىقپال ەتەدى.

جۇك تاسىمالى: جاڭا رەكوردتار

اۋەجايدىڭ لوگيستيكالىق الەۋەتى كۇشەيىپ كەلەدى. جىل ىشىندە 12 470 824 كەلى جۇك پەن پوشتا وڭدەلدى، بۇل وتكەن جىلمەن سالىستىرعاندا 39 پايىزعا ارتىق. بۇل رەتتە حالىقارالىق جۇك تاسىمالى 78%-عا ءوستى، بۇل جاھاندىق لوگيستيكادا اۋەجاي بەدەلىنىڭ كوتەرىلىپ كەلە جاتقانىن كورسەتەدى.

زاماناۋي ينفراقۇرىلىم – جاڭا مۇمكىندىكتەر

ەلوردا اۋەجايى ۇشۋ قاۋىپسىزدىگىن بارىنشا قامتاماسىز ەتۋگە تاعى ءبىر قادام جاسادى. استانا اۋەجايىندا حالىقارالىق ستاندارتتارعا تولىق ساي كەلەتىن ۇشاقتاردى ەۆاكۋاسيالاۋعا ارنالعان زاماناۋي قۇرال-جابدىقتار ۇسىنىلدى. اتالمىش تەحنيكا كەز كەلگەن ۇشاقپەن، سونىڭ ىشىندە ەڭ ءىرى Airbus A350 جانە Boeing 747-8 ۇشاقتارىمەن جۇمىس ىستەۋگە قابىلەتتى.

سونىمەن قاتار اۋەجاي ءورت ءسوندىرۋ كولىكتەرىنىڭ الەمدەگى ەڭ وزىق ۇلگىلەرىنىڭ ءبىرى – Rosenbauer Panther 6x6 ەلىمىزدە ءبىرىنشى بولىپ استانا حالىقارالىق اۋەجايىندا پايدا بولدى. ول اۆسترياداعى Rosenbauer International AG زاۋىتىندا وندىرىلگەن جانە ەڭ جوعارى قاۋىپسىزدىك تالاپتارىنا جاۋاپ بەرەدى. بۇل وقيعا ورنىنا تەز جەتىپ، كەز كەلگەن توتەنشە جاعدايعا جەدەل ارەكەت ەتە الاتىن بىرەگەي تەحنيكا.

Rosenbauer Panther 6x6 كولىگى نەبارى 30 سەكۋندتا 80 كم/ساع جىلدامدىققا جەتەدى، بۇل توتەنشە جاعداي ايماعىنا قىسقا مەرزىمدە جەتۋگە مۇمكىندىك بەرەدى. ەڭ جوعارى جىلدامدىعى 115 كم/ساع، بۇل ونى ءوز كلاسىنداعى ەڭ جىلدام كولىكتەردىڭ ءبىرى ەتەدى. ءورت ءسوندىرۋ كولىگىنىڭ ارنايى ديزاينى 50%-عا دەيىنگى ەڭىستەردى ەڭسەرىپ، 30 گرادۋسقا دەيىنگى بۇيىرلىك ەڭىستەرگە توتەپ بەرە وتىرىپ، ءتىپتى قيىن جەرلەردە دە سەنىمدى قوزعالۋعا مۇمكىندىك بەرەدى.

ءورت ءسوندىرۋ ءۇشىن Rosenbauer Panther 12500 ليترلىك سۋ ىدىسىمەن، 1500 ليترلىك كوبىكتى رەزەرۆۋارمەن جانە 250 كگ ۇنتاقپەن ءسوندىرۋ جۇيەسىمەن جابدىقتالعان. سورعى مينۋتىنا 9 000 ليترگە دەيىن سۋ بەرەدى، ال اعىننىڭ دياپازونى 100 مەترگە جەتەدى. وسىنىڭ بارلىعى ورتتەردى مۇمكىندىگىنشە تەزىرەك وقشاۋلاۋعا جانە ىقتيمال زارداپتاردى ازايتۋعا مۇمكىندىك بەرەدى.

سونىمەن قاتار، اۋەجايدىڭ اپاتتىق-قۇتقارۋ قىزمەتىنىڭ جۇمىسكەرلەرى اۋە كەمەلەرىندەگى ورتتەردى ءسوندىرۋدىڭ ءتۇرلى سەنارييلەرىن جاتتىقتىرا وتىرىپ، ارنايى دايىندىقتان ءوتتى. مۇنداي تەحنولوگيانى ەنگىزۋ اۋەجايعا ۇشۋ قاۋىپسىزدىگىن تولىق قامتاماسىز ەتەدى.

بولاشاق: جاڭا ساپا ستاندارتتارى

2025 جىلدىڭ قاڭتارىندا استانا قالاسىنىڭ اكىمدىگى مەن «Terminals Astana Airport Management» ج ش س اراسىندا جاڭا سەنىمگەرلىك باسقارۋ شارتى جاسالدى. قازىرگى ۋاقىتتا ينۆەستور مەن قازاقستاندىق تاراپ اراسىندا ۇزاق مەرزىمدى ينۆەستيسيالىق كەلىسىم جاساۋ جۇمىستارى جۇرگىزىلۋدە. ءوز كەزەگىندە ينۆەستور جولاۋشىلار اعىنىنىڭ ءوسۋىن ەسكەرە وتىرىپ، قولدانىستاعى ۇشۋ-قونۋ جولاعىن قايتا قۇرۋدى، ەكىنشى ۇشۋ-قونۋ جولاعىن سالۋدى، تەرمينالداردى كەڭەيتۋدى جانە جاڭا تەرمينال سالۋدى جوسپارلاپ وتىر. سونداي-اق ينۆەستور اۋەجايدىڭ قازىرگى ينفراقۇرىلىمىمەن جۇمىس ىستەپ، اۆياكومپانيالاردى كوبىرەك تارتتىرىپ، مارشرۋتتار جەلىسىن كەڭەيتەدى، سونداي-اق جولاۋشىلار اعىنىن ارتتىرۋ بويىنشا جۇمىستار جۇرگىزەدى.

اۆياسيا كۇنى – اۋە قاتىناسىن دامىتىپ، ەلدەر مەن كوپتەگەن جۇرەكتى توعىستىراتىن جانداردىڭ مەرەكەسى

استانا حالىقارالىق اۋەجايىنىڭ مىڭداعان قىزمەتكەرى – جولاۋشىلاردىڭ كوزىنە تۇسپەسە دە، ولاردىڭ ءساتتى ساپار جاساۋى ءۇشىن اسا ماڭىزدى جۇمىستى اتقارىپ جۇرگەن ماماندار.

اۆياسيا سالاسىنداعى بارشا جاندى كاسىبي مەرەكەسىمەن قۇتتىقتايمىز!

اسپان ءاردايىم اشىق، ءار رەيس ءساتتى بولسىن!