سەمەيدەن ەلىمىزدىڭ ءىرى قالالارىنا قاتىنايتىن تۇراقتى اۋە رەيستەرىنىڭ سانى ارتادى. بيىلعى 27 ساۋىردەن «سەمەي-استانا-سەمەي» باعىتىندا سىيىمدىلىعى 48 ورىندىق «ان-24» ۇشاعى جولاۋشىلاردى تاسىمالداي باستايدى، – دەپ حابارلايدى Dalanews.kz اباي وبلىسى اكىمىنىڭ باسپا ءسوز قىزمەتىنە سىلتەمە جاساپ.

رەيستى «يۋجنوە نەبو» اۋە كومپانياسى جۇزەگە اسىرادى. سەمەيدەن استاناعا ۇشۋ ۋاقىتى – كەشكى ساعات 18:15، استانادان سەمەيگە ۇشۋ ۋاقىتى – كەشكى ساعات 21:15.

بۇل تۋرالى وبلىس اكىمى بەرىك ءۋالي سەمەيدەگى حالىقارالىق اۋەجايدىڭ جۇمىسىمەن تانىسۋ بارىسىندا ايتتى.

– جولاۋشىلاردىڭ ءوتىنىشىن ەسكەرە وتىرىپ كولىك مينيسترلىگى، اۋە كومپانياسى جانە وبلىس اكىمدىگىنىڭ ءۇش جاقتى كەلىسىمى ناتيجەسىندە وسىنداي ۋاعدالاستىققا قول جەتكىزدىك. 10 مامىرعا دەيىن اپتاسىنا ءۇش رەيس ورىندالادى. ال مامىردىڭ ورتاسىنان باستاپ ۇشۋ جيىلىگى اپتاسىنا 5 رەتكە دەيىن ۇلعايادى. اۋە كومپانياسىنىڭ قۇرىلتايشىلارى بولاشاقتا جاز مەزگىلىندە قاتىنايتىن جاڭا ۇشاقتاردى جەلىگە شىعاراتىنىن ايتىپ وتىر. الداعى ۋاقىتتا قاراعاندى باعىتىندا سۋبسيديالاناتىن جاڭا اۋە رەيسىن اشۋ جوسپارىمىزدا بار. قازىرگى ۋاقىتتا كولىك مينيسترلىگىمەن كەلىسسوز جۇرگىزىلۋدە، – دەدى ايماق باسشىسى.

بيىلعى 1 مامىردان باستاپ «الماتى-سەمەي-الماتى» (اپتاسىنا ءۇش رەت)، «استانا-سەمەي-استانا» (اپتاسىنا ءبىر رەت) باعىتتارىندا قوسىمشا رەيس ەنگىزىلەدى. بۇدان بولەك 1 ماۋسىمنان باستاپ «FlyArystan» اۋە كومپانياسى «شىمكەنت – سەمەي – شىمكەنت» باعىتى بويىنشا جاڭا رەيستى ىسكە قوسپاق.

جولاۋشىلار اپتاسىنا 2 رەت، دۇيسەنبى جانە بەيسەنبى كۇندەرى قاتىنايتىن بولادى. سونداي-اق، وسى كۇننەن "سكات" اۋە كومپانياسى "ءالماتى-ۇرجار-الماتى"، "ءاستانا-ۇرجار-استانا" رەيستەرىن ءارقايسىسىن اپتاسىنا 6 رەتتەن ورىنداي باستايدى.

قازىرگى ۋاقىتتا سەمەي قالاسىنان «سەمەي – الماتى»، «سەمەي – استانا» جانە «سەمەي – ءۇرجار» باعىتتارى بويىنشا تۇراقتى اۋە رەيستەرى ورىندالۋدا. اتالعان رەيستەردى «FlyArystan» جانە «يۋجنوە نەبو» اۋە كومپانيالارى جۇزەگە اسىرىپ كەلەدى.