پرەمەر-مينيستر ولجاس بەكتەنوۆ مەملەكەت باسشىسى قويعان حالىقارالىق اۆياسيالىق حاب قۇرۋ جونىندەگى مىندەتتەر اياسىندا استانا قالاسىنىڭ حالىقارالىق اۋەجايىن دامىتۋ ماسەلەلەرى بويىنشا كەڭەس وتكىزدى، دەپ حابارلايدى Dalanews.kz ق ر ۇكىمەتىنىڭ باسپا ءسوز قىزمەتىنە سىلتەمە جاساپ.
جيىن بارىسىندا پرەمەر-مينيسترگە استانا اۋەجايىنىڭ ۇشۋ-قونۋ جولاعىن جوسپارلى جوندەۋ مەرزىمىنىڭ اياقتالعانى تۋرالى باياندالدى. جۇرگىزىلگەن جۇمىستار ينفراقۇرىلىمنىڭ سەنىمدىلىگى مەن ۇشۋ قاۋىپسىزدىگىن ارتتىرۋعا باعىتتالعان. استانا قالاسىنىڭ اكىمى جەڭىس قاسىمبەك اۋە ايلاعىنىڭ ماتەريالدىق-تەحنيكالىق بازاسىن ودان ءارى رەكونسترۋكسيالاۋ جانە نىعايتۋ جوسپارلارى تۋرالى حاباردار ەتتى.
جوبادا جاڭا ۇشۋ-قونۋ جولاعىن سالۋ، پەرروندار مەن تەرمينالداردى جوندەۋ، تەحنيكالىق قۇرالداردى جاڭارتۋ سىندى تاعى دا باسقا جۇمىستار قاراستىرىلعان. ودان بولەك، لوگيستيكالىق كەشەندەر، قويمالار، قوناقۇيلەر، كەڭسەلەر جانە اكىمشىلىك عيماراتتاردى قوسا العاندا ينفراقۇرىلىمدى دامىتۋ جوسپارلانىپ وتىر. بۇگىنگى تاڭدا اۋەجاي جىلىنا 9 ملن-عا جۋىق جولاۋشىعا قىزمەت كورسەتەدى. جوبانى جۇزەگە اسىرۋ تاياۋداعى بىرنەشە جىلدا بۇل كورسەتكىشتى ورتا ەسەپپەن 12 ملن جولاۋشىعا دەيىن ارتتىرۋعا مۇمكىندىك بەرەدى.
جيىنعا قاتىسۋشىلار اۋەجايدى ودان ءارى دامىتۋ ءۇشىن ينۆەستورلار تارتۋ ماسەلەسىن تالقىلادى. ءىرى حالىقارالىق كورپوراسيالار تاراپىنان قىزىعۋشىلىق بارى اتاپ ءوتىلدى.
كەڭەس قورىتىندىسىندا پرەمەر-مينيستر كولىك مينيسترلىگى مەن استانا قالاسىنىڭ اكىمدىگىنە ەلوردانىڭ اۆياسيالىق الەۋەتىن دامىتۋعا باعىتتالعان جوبانى جۇزەگە اسىرۋ ماسەلەسىن باقىلاۋدا ۇستاۋدى تاپسىردى.
