استانا قالاسىنىڭ اكىمى جەڭىس قاسىمبەك ءوندىرىس ەلدى مەكەنىنىڭ تۇرعىندارىمەن كەزدەسۋدە كوتەرىلگەن ماسەلەلەر تۋرالى ايتتى، دەپ حابارلايدى ەلوردا اكىمدىگىنىڭ رەسمي سايتى.
«ءوندىرىس ەلدى مەكەنىنىڭ (بايقوڭىر اۋدانى، لەسوزاۆود) تۇرعىندارىمەن كەزدەستىم. ولار اپاتتى تۇرعىن ۇيلەردى بۇزۋ، جول سالۋ، كارىز، كوپىر سالۋ، گازداندىرۋ، ەلەكترمەن جابدىقتاۋ، مارشرۋتتاردى ىسكە قوسۋ، اباتتاندىرۋ جانە ت.ب. ماسەلەلەردى كوتەردى.
ماڭىزدى جانە كۇردەلى ماسەلەلەردىڭ ءبىرى – توزىعى جەتكەن اپاتتى تۇرعىن ۇيلەردى بۇزۋ. ءوندىرىس ەلدى مەكەنىندە باراك ءتارىزدى ۇيلەر بار، ولار 60 جىل بۇرىن بۇزىلۋى كەرەك ەدى. وسىعان دەيىن ايتقانىمداي، ءقازىر مۇنداي ۇيلەردىڭ ءتىزىمىن جاڭارتىپ جاتىرمىز. ولاردى بۇزۋ كەستەسىن جاسايمىز. ماسەلەن الداعى 3 جىلدا توزىعى جەتكەن اپاتتى ۇيلەردىڭ تۇرعىندارى ءۇشىن 2،5-3 مىڭ پاتەر سالۋدى جوسپارلاپ وتىرمىز. سول سياقتى جىل سايىن كەزەكتە تۇرعاندار ءۇشىن جەڭىلدەتىلگەن قولجەتىمدى تۇرعىن ۇيلەر سالامىز.
گازداندىرۋ بويىنشا. وسىعان دەيىن الماتى جانە سارىارقا اۋداندارىنىڭ تۇرعىندارىنا ۇيلەرىن گازعا قوسۋ مۇمكىندىگى جاسالعان. ءقازىر بايقوڭىر جانە ەسىل اۋداندارىندا گاز قۇبىرىنىڭ قۇرىلىسى ءجۇرىپ جاتىر، ودان كەيىن كۆارتالىشىلىك جەلىلەردى سالۋعا كىرىسەمىز.
سونىمەن قاتار قالادا تىرشىلىكتى قامتاماسىز ەتۋ جۇيەسىنىڭ ءبىرقاتار نىسانىن سالامىز، ينجەنەرلىك جەلىلەردى جاڭعىرتۋ، ەلەكتر قوسالقى ستانسيالارىن رەكونسترۋكسيالاۋ جانە ت.ب. جۇمىس جۇرگىزىلەدى.
سۇراقتار كوپ، ءبارى بىردەن شەشىلمەيدى. ولاردى كەزەڭ-كەزەڭ بويىنشا شەشەمىز. اۋدان اكىمدىگى ورىندالۋ مەرزىمى تۋرالى حاباردار ەتەدى»، — دەپ جازدى ەلوردا اكىمى.
