Astana qalasynyń ákimi Jeńis Qasymbek Óndiris eldi mekeniniń turǵyndarymen kezdesýde kóterilgen máseleler týraly aitty, dep habarlaidy elorda ákimdiginiń resmi saity.
«Óndiris eldi mekeniniń (Baiqońyr aýdany, Lesozavod) turǵyndarymen kezdestim. Olar apatty turǵyn úilerdi buzý, jol salý, káriz, kópir salý, gazdandyrý, elektrmen jabdyqtaý, marshrýttardy iske qosý, abattandyrý jáne t.b. máselelerdi kóterdi.
Mańyzdy jáne kúrdeli máselelerdiń biri – tozyǵy jetken apatty turǵyn úilerdi buzý. Óndiris eldi mekeninde barak tárizdi úiler bar, olar 60 jyl buryn buzylýy kerek edi. Osyǵan deiin aitqanymdai, qazir mundai úilerdiń tizimin jańartyp jatyrmyz. Olardy buzý kestesin jasaimyz. Máselen aldaǵy 3 jylda tozyǵy jetken apatty úilerdiń turǵyndary úshin 2,5-3 myń páter salýdy josparlap otyrmyz. Sol siiaqty jyl saiyn kezekte turǵandar úshin jeńildetilgen qoljetimdi turǵyn úiler salamyz.
Gazdandyrý boiynsha. Osyǵan deiin Almaty jáne Saryarqa aýdandarynyń turǵyndaryna úilerin gazǵa qosý múmkindigi jasalǵan. Qazir Baiqońyr jáne Esil aýdandarynda gaz qubyrynyń qurylysy júrip jatyr, odan keiin kvartalishilik jelilerdi salýǵa kirisemiz.
Suraqtar kóp, bári birden sheshilmeidi. Olardy kezeń-kezeń boiynsha sheshemiz. Aýdan ákimdigi oryndalý merzimi týraly habardar etedi», — dep jazdy elorda ákimi.
