"جاستارعا سالافيلىكتىڭ ءبىزدىڭ جولىمىز ەمەسىن، اتا-بابالارىمىزدىڭ جولى بولماعانىن جانە ەكسترەميستەر، راديكالدار ناسيحاتتايتىن يدەيالاردىڭ ءبىزدىڭ ۇلتتىق كودىمىزعا سايكەسپەيتىنىن ۇقتىرۋىمىز كەرەك" دەدى اشىمبايەۆ استانادا ءوتىپ جاتقان ءدىنتانۋشىلاردىڭ جەتىنشى فورۋمىندا.
ول بيىل جەلتوقساندا قازاقستان پارلامەنتىنە ءدىني قىزمەت جانە ءدىني بىرلەستىكتەر ماسەلەلەرى تۋرالى زاڭعا وزگەرىستەر مەن تۇزەتۋلەر ەنگىزۋ جونىندەگى زاڭ جوباسى تۇسەتىنىن ايتتى. جوبادا بيلىك "بالالاردى اتا-اناسىنىڭ رۇقساتىنسىز ءدىني ىس-ارەكەتكە ارالاستىرۋدىڭ جاۋاپكەرشىلىگىن" رەتتەپ، جازاسىن كۇشەيتكىسى كەلەدى. اشىمبايەۆتىڭ سوزىنشە، قازاقستاندىقتاردىڭ "شەتەلدە كۇدىكتى ءدىني ۇيىمداردا" ءبىلىم الۋى ماسەلەسىنە ءجىتى باقىلاۋ جاساۋ كەرەك. ول مۇنداي وقۋ ورىندارىن بىتىرگەندەر ەلگە "الدە ءبىر ەكسترەميستىك، راديكالدىق يدەولوگيانى ءسىڭىرىپ قايتاتىنىن" ايتادى.
"شىن مانىندە، قازاقستانداعى سالافيلىك جانە باسقا دا راديكالدىق ۇيىمدار ىشكى سەبەپتەن پايدا بولعان جوق. ولار بىزگە سىرتتان راديكالدىق يدەيانى تاڭعىسى كەلگەنى سەبەبىنەن پايدا بولعان. بۇل ۇيىمدار قازاقستاننىڭ دەسترۋكتيۆتى ءىس-قيمىلداردىڭ بەلسەندى بولعانىن قالايدى" دەدى ماۋلەن اشىمبايەۆ.
ونىڭ پىكىرىنشە، قازاقستان بۇكىل يسلام الەمىندە ءسوزىن تىڭدايتىن، حالىقارالىق دەڭگەيدەگى ءوزىنىڭ 25-30 تەولوگىن دايىنداۋى كەرەك، بۇل ءۇشىن ولار "مەملەكەتشىل جانە ءوز ەلىنىڭ پاتريوتى بولۋى ءتيىس".
فورۋمعا قاتىسىپ جاتقان ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ كوپ نارسە ءدىني نورمالاردى تۇسىندىرۋگە بايلانىستى ەكەنىن، كوپشىلىگى مۇنى ءار قيلى تۇسىنەتىندىكتەن راديكاليزم پايدا بولاتىنىن ايتتى. ەرمەكبايەۆ قازاقستاننىڭ "ءوز تاريحى، مادەنيەتى، مەنتاليتەتى بار، كوپۇلتتى مەملەكەت ەكەنىن" ايتىپ، وسىنىڭ بارلىعىن ەسكەرە وتىرىپ "يسلامنىڭ بازالىق ەرەجەلەرىن ەمەس، يسلام ەرەجەلەرىن ءتۇسىندىرۋدىڭ وزىندىك مودەلىن" جاساۋ كەرەگىن مالىمدەدى. ونىڭ سوزىنشە، وسى سەبەپتى يسلامتانۋدىڭ قازاقستاندىق مەكتەبىن قالىپتاستىرۋ كەرەك.
