"Jastarǵa salafıliktiń bizdiń jolymyz emesin, ata-babalarymyzdyń joly bolmaǵanyn jáne ekstremıster, radıkaldar nasıhattaıtyn ıdeıalardyń bizdiń ulttyq kodymyzǵa sáıkespeıtinin uqtyrýymyz kerek" dedi Áshimbaev Astanada ótip jatqan dintanýshylardyń jetinshi forýmynda.
Ol bıyl jeltoqsanda Qazaqstan parlamentine dinı qyzmet jáne dinı birlestikter máseleleri týraly zańǵa ózgerister men túzetýler engizý jónindegi zań jobasy túsetinin aıtty. Jobada bılik "balalardy ata-anasynyń ruqsatynsyz dinı is-áreketke aralastyrýdyń jaýapkershiligin" rettep, jazasyn kúsheıtkisi keledi. Áshimbaevtiń sózinshe, qazaqstandyqtardyń "shetelde kúdikti dinı uıymdarda" bilim alýy máselesine jiti baqylaý jasaý kerek. Ol mundaı oqý oryndaryn bitirgender elge "álde bir ekstremıstik, radıkaldyq ıdeologıany sińirip qaıtatynyn" aıtady.
"Shyn máninde, Qazaqstandaǵy salafılik jáne basqa da radıkaldyq uıymdar ishki sebepten paıda bolǵan joq. Olar bizge syrttan radıkaldyq ıdeıany tańǵysy kelgeni sebebinen paıda bolǵan. Bul uıymdar Qazaqstannyń destrýktıvti is-qımyldardyń belsendi bolǵanyn qalaıdy" dedi Máýlen Áshimbaev.
Onyń pikirinshe, Qazaqstan búkil ıslam áleminde sózin tyńdaıtyn, halyqaralyq deńgeıdegi óziniń 25-30 teologyn daıyndaýy kerek, bul úshin olar "memleketshil jáne óz eliniń patrıoty bolýy tıis".
Forýmǵa qatysyp jatqan din isteri jáne azamattyq qoǵam mınıstri Nurlan Ermekbaev kóp nárse dinı normalardy túsindirýge baılanysty ekenin, kópshiligi muny ár qıly túsinetindikten radıkalızm paıda bolatynyn aıtty. Ermekbaev Qazaqstannyń "óz tarıhy, mádenıeti, mentalıteti bar, kópultty memleket ekenin" aıtyp, osynyń barlyǵyn eskere otyryp "ıslamnyń bazalyq erejelerin emes, ıslam erejelerin túsindirýdiń ózindik modelin" jasaý keregin málimdedi. Onyń sózinshe, osy sebepti ıslamtanýdyń qazaqstandyq mektebin qalyptastyrý kerek.
