قارجىلىق مونيتورينگ اگەنتتىگى «ارسەلورميتتالتەمىرتاۋ» اق-نىڭ قۇقىقتىق ميراسقورى سانالاتىن Qarmet كومپانياسىنىڭ مۇلكىن جىمقىرۋ دەرەگى بويىنشا تەرگەۋ جۇرگىزىپ جاتىر. كۇدىكتى رەتىندە «الباسترويدور» ج ش س ديرەكتورى سەرگەي كيم تانىلىپ، وعان كاسىپورىن ءونىمىن 1،8 ملرد تەڭگەدەن استام سوماعا زاڭسىز شىعاردى دەگەن ايىپ تاعىلىپ وتىر، دەپ حابارلايدى Dalanews.kz.
ءافم-نىڭ ب ا ق سۇراۋلارىنا بەرگەن جاۋابىنا سايكەس، تەرگەۋ مەتاللۋرگيالىق زاۋىت اۋماعىنان دومنا قوسپاسى مەن كەسەك شويىندى ۇرلاۋ فاكتىسى بويىنشا جۇرگىزىلۋدە.
قىلمىستىق سحەما قالاي جۇزەگە اسقان؟
2015 جىلى «ارسەلورميتتالتەمىرتاۋ» اق مەن «الباسترويدور» ج ش س اراسىندا دومنا شلاگىن قايتا وڭدەۋ تۋرالى كەلىسىمشارت جاسالعان. الايدا قۇجاتتا قايتا وڭدەۋ قالدىقتارىنا يەلىك ەتۋ نەمەسە ولاردى وتكىزۋ قۇقىعى قاراستىرىلماعان.
سوعان قاراماستان، تەرگەۋ دەرەگىنشە، سەرگەي كيم وندىرىستىك نىساندارعا ەركىن قولجەتىمدىلىگىن پايدالانىپ، زاۋىت اۋماعىنان دومنا قوسپاسى مەن كەسەك شويىندى جۇيەلى تۇردە شىعارىپ وتىرعان.
ۇرلانعان ءونىمدى كەدەرگىسىز تاسىمالداۋ ءۇشىن قىلمىستىق سحەماعا «كۋزەت 2050» ج ش س اتتى اففيليرلەنگەن كۇزەت ۇيىمى تارتىلعان. اگەنتتىك مالىمەتىنشە، كۇزەت قىزمەتكەرلەرى اۆتوكولىكتەردىڭ زاۋىت اۋماعىنان ءىس جۇزىندە باقىلاۋسىز وتۋىنە جاعداي جاساعان.
ال جىمقىرىلعان ءونىم كەيىننەن سەرگەي كيمنىڭ باقىلاۋىنداعى «گلوبالسپەستورگ» جانە «سەنتروپتسناب» ج ش س ارقىلى زاڭداستىرىلعان.
كەلتىرىلگەن شىعىن
تەرگەۋ قورىتىندىسىنا سايكەس، زاڭسىز ارەكەتتەر سالدارىنان 31 مىڭ توننادان استام ءونىم ۇرلانىپ، مەملەكەتكە كەلتىرىلگەن جالپى شىعىن 1،8 ملرد تەڭگەدەن اسادى.
قازىرگى ۋاقىتتا كۇدىكتى سەرگەي كيم ەكى اي مەرزىمگە قاماۋعا الىنعان. سوتقا دەيىنگى تەرگەۋ امالدارى جالعاسىپ جاتىر.
