الماتىداعى شىمبۇلاق تاۋ-شاڭعى كۋرورتىندا ورنالاسقان Gusto مەيرامحاناسى ۇلكەن داۋدان كەيىن قوناقتارعا قازاق تىلىندە قىزمەت كورسەتۋدى قولعا الدى، دەپ حابارلايدى Dalanews.kz.
ۆيدەودا قىزمەتكەرلەر كەلۋشىلەردى قازاقشا سويلەپ، قارسى الىپ جاتقانى كورىنەدى.
“مەملەكەتتىك ءتىلدى مەڭگەرۋ - ەلگە، مادەنيەتكە جانە كەلۋشىلەرگە دەگەن قۇرمەتتىڭ بەلگىسى. ءبىزدىڭ كوماندادا ءتۇرلى ۇلت وكىلدەرى جۇمىس ىستەيدى. ولاردىڭ كوپشىلىگى قازاق ءتىلىن سانالى تۇردە ۇيرەنىپ، قىزمەت بارىسىندا قولدانىپ جاتىر. بۇل تالپىنىستارىن باعالايمىز جانە قولدايمىز”، - دەلىنگەن رەسمي حابارلامادا.
Gusto وكىلدەرى قىزمەتكەرلەر قازاقشا اكسەنتپەن سويلەسە دە، ءتىل ۇيرەنۋگە ىنتالى ەكەنىن اتاپ ءوتتى.
“ءتىل - قولدانعاندا عانا داميدى. ءبىز ءوزارا قۇرمەت پەن قولداۋدى قۇپتايمىز”، - دەدى مەيرامحانا باسشىلىعى.
ايتا كەتەيىك، بۇعان دەيىن اتالعان مەيرامحانىنىڭ اكىمشىسى ەلەنا زاڭگەر مەيىرمان شەكەيەۆپەن كەزدەسىپ، ونىڭ Instagram پاراقشاسىندا ۆيدەو ارقىلى حالىقتان كەشىرىم سۇراعان ەدى.
“مەن قازاقستان ازاماتىمىن جانە حالقىمنان كەشىرىم سۇرايمىن. ەموسياعا بەرىلىپ “كسرو-دا تۋدىم” دەپ ايتقانىم ءۇشىن كەشىرىم وتىنەمىن. ەشكىمدى رەنجىتۋ ويىمدا بولمادى”، — دەدى ول.
ۆيدەودا مەيىرمان شەكەيەۆتىڭ مەيرامحاناعا بارىپ، مازىردەگى قاتەلەردى تۇزەتۋدى سۇراعانى دا كورىنەدى. رەستوران اكىمشىلىگى جاعدايعا بايلانىستى كەشىرىم سۇراپ، ءمازىردى تۇزەتۋگە ۋادە بەرگەن.
ايتا كەتەيىك، بۇعان دەيىن مەيرامحانا اكىمشىسى قازاقشا قىزمەت كورسەتۋدەن باس تارتىپ، سىنعا قالعان ەدى. كەيىن قىزمەتكەر جۇمىستان شىعارىلدى.
