تۇركىستان وبلىسى، ارىس قالاسى، ۆلاديمير كوماروۆ اتىنداعى №8 مەكتەپتىڭ 11-سىنىپ وقۋشىسى شاپاعات سەيىلحانعا الەمدىك ۋنيۆەرسيتەتتەر نازارىن اۋدارىپ وتىر. ياعني، Case Western University، Chicago State University، Clark University، Colarado State University، California State University سەكىلدى وقۋ ورىندارى ارنايى شاقىرتۋلار جىبەرىپ، ءبىلىم گرانتتارىن ۇسىنعان. ال ونىڭ تاڭداۋى چيكاگو ۋنيۆەرسيتەتىنە تۇسكەن. سەبەبى ونداعى رەيتينگ الەمدىك دەڭگەيدە جوعارى باعالانادى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

الەمدىك جوعارعى وقۋ ورىندارىنىڭ نازارىن اۋدارۋعا شاپاعاتتىڭ جازعان تۇيىندەمەسى سەبەپ بولعان. وندا، ول ءوزىنىڭ ءومىرى مەن تالابى تۋرالى ەرەكشە سيپاتتاپ، جازبا قالدىرىپتى. الەمنىڭ 28 ۋنيۆەرسيتەتىنە جازعان حاتتارىنان 21 جاۋاپ كەلگەن. بارلىعى  جاس تۇلەكتى وقۋعا شاقىرسا، ال 7 جوعارى وقۋ ورنى ءالى جاۋاپ بەرمەگەن.

ونىڭ ايتۋىنشا، «التىن بەلگىگە» دە، «ۇزدىك» اتتەستاتقا دا ۇمىتكەر ەمەس. دەگەنمەن بالا كۇنىنەن اعىلشىن ءتىلى ءپانىن جاقسى وقىعان. ءتىپتى 9-سىنىپتا جۇرگەندە-اق IELTS سىناعىن تاپسىرامىن دەگەن ارمانى بولىپ، سودان باستاپ  تىلدىك قورىن مولايتىپ، قوسىمشا ءبىلىم العان.

شاپاعات سەيىلحان بولاشاقتا ءوزىنىڭ ءومىرىن حالىقارالىق قاتىناستار سالاسىمەن بايلانىستىرعىسى كەلەدى. ياعني ءبىلىم الىپ، ەلشى بولۋدى ارماندايدى.