Túrkistan oblysy, Arys qalasy, Vladımır Komarov atyndaǵy №8 mekteptiń 11-synyp oqýshysy Shapaǵat Seıilhanǵa álemdik ýnıversıtetter nazaryn aýdaryp otyr. Iaǵnı, Case Western University, Chicago State University, Clark University, Colarado State University, California State University sekildi oqý oryndary arnaıy shaqyrtýlar jiberip, bilim granttaryn usynǵan. Al onyń tańdaýy Chıkago ýnıversıtetine túsken. Sebebi ondaǵy reıtıń álemdik deńgeıde joǵary baǵalanady, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Álemdik joǵarǵy oqý oryndarynyń nazaryn aýdarýǵa Shapaǵattyń jazǵan túıindemesi sebep bolǵan. Onda, ol óziniń ómiri men talaby týraly erekshe sıpattap, jazba qaldyrypty. Álemniń 28 ýnıversıtetine jazǵan hattarynan 21 jaýap kelgen. Barlyǵy  jas túlekti oqýǵa shaqyrsa, al 7 joǵary oqý orny áli jaýap bermegen.

Onyń aıtýynsha, «Altyn belgige» de, «Úzdik» atestatqa da úmitker emes. Degenmen bala kúninen aǵylshyn tili pánin jaqsy oqyǵan. Tipti 9-synypta júrgende-aq IELTS synaǵyn tapsyramyn degen armany bolyp, sodan bastap  tildik qoryn molaıtyp, qosymsha bilim alǵan.

Shapaǵat Seıilhan bolashaqta óziniń ómirin halyqaralyq qatynastar salasymen baılanystyrǵysy keledi. Iaǵnı bilim alyp, elshi bolýdy armandaıdy.