2025 جىلدان باستاپ حالىقارالىق ارالدى قۇتقارۋ قورىنىڭ اتقارۋشى كوميتەتى (حاقق اك) سىرداريا وزەنى باسسەينىندە سۋ رەسۋرستارىن ءتيىمدى پايدالانۋعا باعىتتالعان جاڭا جوبانى جۇزەگە اسىرىپ جاتىر. جوبا قاشىقتىقتان زوندتاۋ دەرەكتەرى مەن زاماناۋي سپۋتنيكتىك كارتوگرافيالاۋ تەحنولوگيالارىن قولدانۋ ارقىلى اۋىل شارۋاشىلىعى داقىلدارىنىڭ سۋ تۇتىنۋ نورمالارى مەن سۋارۋ رەجيمدەرىن ناقتىلاۋدى كوزدەيدى، دەپ حابارلايدى Dalanews.kz.
جوبا فرانسۋز دامۋ اگەنتتىگىنىڭ (AFD) گرانتتىق قولداۋىمەن ىسكە اسىرىلۋدا جانە ەكى جىلعا جوسپارلانعان. ناتيجەسىندە نەگىزگى اۋىل شارۋاشىلىعى داقىلدارى بويىنشا عىلىمي نەگىزدەلگەن، جاڭارتىلعان سۋ تۇتىنۋ نورمالارى ازىرلەنىپ، سۋ رەسۋرستارىن ۇزاق مەرزىمدى جوسپارلاۋعا ارنالعان زاماناۋي اناليتيكالىق بازا قالىپتاستىرۋ كوزدەلگەن. بۇل جەردىڭ تۇزدانۋى مەن توزۋى تاۋەكەلدەرىن ازايتۋعا دا ىقپال ەتپەك.
عىلىمي-زەرتتەۋ جانە ساراپتامالىق جۇمىستاردى جۇرگىزۋگە قازاق سۋ شارۋاشىلىعى عىلىمي-زەرتتەۋ ينستيتۋتى (قازسشعزي) مەن سۋ شارۋاشىلىعىن مەملەكەتارالىق ۇيلەستىرۋ كوميسسياسىنىڭ عىلىمي-اقپاراتتىق ورتالىعى (سشمۇك عاو) تارتىلعان. جينالعان ماتەريالدار كليماتتىڭ وزگەرۋ جاعدايىن ەسكەرە وتىرىپ، مەملەكەتتىك ورگاندارعا، عىلىمي ۇيىمدارعا جانە سالا ماماندارىنا ۇسىنىلادى.
جوبا قازاقستان مەن وزبەكستانداعى 1،7 ميلليون گەكتاردان استام سۋارمالى جەردى قامتيدى. اتاپ ايتقاندا، قازاقستاننىڭ تۇركىستان جانە قىزىلوردا وبلىستارى، سونداي-اق وزبەكستاننىڭ فەرعانا القابىنداعى ءاندىجان، نامانعان جانە فەرعانا وبلىستارى زەرتتەۋ اۋماعىنا ەنگەن. وسى وڭىرلەردە كليمات، توپىراق، جەر استى سۋلارى جانە اۋىل شارۋاشىلىعى جەرلەرىنىڭ جاعدايى بويىنشا دەرەكتەر جيناقتالىپ، جاڭارتىلادى.
2026 جىلعى 27 قاڭتاردا شىمكەنت قالاسىندا جوبانى ىسكە اسىرۋدىڭ العاشقى جىلىنىڭ قورىتىندىسىنا ارنالعان العاشقى ايماقتىق سەمينار ءوتتى. وندا گيدرومودۋلدىك اۋدانداستىرۋعا قاتىستى الدىن الا ماتەريالدار مەن دالالىق زەرتتەۋلەردىڭ ناتيجەلەرى ۇسىنىلىپ، تاجىريبە الماسۋ جۇرگىزىلدى.
جوبا اياسىندا بارلىعى ءۇش ايماقتىق سەمينار وتكىزۋ جوسپارلانعان. كەلەسى كەزدەسۋلەر قىزىلوردا مەن تاشكەنت قالالارىندا وتەدى. بۇل ءىس-شارالاردا زەرتتەۋدىڭ ناقتىلانعان قورىتىندىلارى مەن ۇسىنىستارىن ۇلتتىق جانە مەملەكەتارالىق سۋ رەسۋرستارىن باسقارۋ تاجىريبەسىنە ەنگىزۋ جولدارى تالقىلانباق.
ساراپشىلاردىڭ پىكىرىنشە، جوبا ايماقتا سۋ قاۋىپسىزدىگىن نىعايتۋعا جانە ورتالىق ازيا ەلدەرىنىڭ تۇراقتى دامۋىن قامتاماسىز ەتۋگە ماڭىزدى ۇلەس قوسادى.
