قازاقستاندا ارال تەڭىزىنىڭ ماڭىندا پايدالى قازبالار وندىرۋگە تىيىم سالۋ جوسپارلانىپ وتىر، دەپ حابارلايدى Dalanews.kz.
ءماجىلىس “جەر قويناۋى جانە جەر قويناۋىن پايدالانۋ تۋرالى” كودەكسكە وزگەرىستەر ەنگىزۋ جونىندەگى تۇزەتۋلەردى ماقۇلدادى. وعان سايكەس، بيلىك ارال تەڭىزى ماڭىندا پايدالى قازبالار وندىرۋگە تىيىم سالۋدى كوزدەيدى.
سونىمەن قاتار، زاڭ جوباسى كەلەسى وزگەرىستەردى قامتيدى:
- جەراستى سۋ رەسۋرستارىن رەتتەۋ جانە پايدالانۋ ماسەلەلەرىن قاراستىراتىن ەكى كودەكستە ءبىرىڭعاي تەرمينولوگيانى قولدانۋ؛
- قازاقستاننىڭ كاسپيي تەڭىزىندەگى سەكتورىندا كومىرسۋتەكتەردى بارلاۋ جانە ءوندىرۋ وپەراسيالارىن جۇرگىزۋگە قويىلعان تىيىمدى الىپ تاستاۋ.
بۇدان بولەك، دەپۋتاتتار اكىمشىلىك كودەكسكە وزگەرىستەر ەنگىزۋ تۋرالى زاڭ جوباسىن دا ماقۇلدادى.
قۇجات كەلەسى قۇقىق بۇزۋشىلىقتار ءۇشىن جازانى قاتاڭداتۋدى قاراستىرادى:
- سۋدى زاڭسىز الۋ؛
- سۋ نىساندارىندا، سۋ قورعاۋ ايماقتارى مەن بەلدەۋلەرىندە رۇقساتسىز قۇرىلىس جۇرگىزۋ؛
- سۋ پايدالانۋ شارتتارى مەن رەجيمىن بۇزۋ؛
- سۋ نىساندارىنىڭ ارناسىن نەمەسە شەكاراسىن زاڭسىز وزگەرتۋ.
“ايىپپۇل مولشەرىن ارتتىرۋدى ورىندى دەپ سانايمىز، سەبەبى قازىرگى كولەمى زاڭ تالاپتارىن ورىنداۋعا جەتكىلىكتى ىنتالاندىرمايدى. ءقازىر ايىپپۇل تولەگەن الدەقايدا ارزانعا تۇسەدى، ال زاڭدى ساقتاۋعا قارجى ءبولۋ ءتيىمسىز بولىپ وتىر”، – دەدى دەپۋتات پاۆەل كازانسيەۆ.
