ءتورت اراب ەلدەرى – ساۋد ارابيا، بىرىككەن اراب امىرلىگى (ءباا)، باحرەين جانە ەگيپەت 22 ماۋسىمدا كاتارعا جاريالاعان بويكوتتى توقتاتۋ ءۇشىن بىرنەشە تالاپتار قويدى دەپ مالىمدەيدى «ءال-جازيرا» تەلەارناسى.
ولار 13 شارتتان تۇراتىن تالاپتارىن جاريالاعان. سولاردىڭ ءبىرى كاتاردان «اعايىندى مۇسىلماندار»، «حەزبوللا»، «ال-كايدا» جانە «يسلام مەملەكەتى» سەكىلدى ەكسترەميستىك ۇيىمدارمەن قارىم-قاتىناستى ءۇزۋدى تالاپ ەتەدى.
اراب ەلدەرى كاتاردان «ءال-جازيرا» تەلەارناسىنىڭ حابارىن تاراتۋدى توقتاتۋدى، يران ديپلوماتيالىق وكىلدىگىن جابۋدى جانە ەلىنەن يران اسكەرىن شىعارۋدى بۇيىرادى. سونىمەن بىرگە يرانمەن ساۋدا قارىم-قاتىناسىن تەك امەريكا سانكسياسىنا سايكەس جۇرگىزۋدى ۇسىنادى. تالاپتاردىڭ ىشىندە كاتارداعى تۇرىك اسكەري بازاسىن جابۋ تۋرالى دا كورسەتىلگەن.
اتالعان ءتورت اراب مەملەكەتى تالاپتاردى ورىنداۋعا كاتارعا 10 كۇن ۋاقىت بەرگەن. كاتار بيلىگى ازىرگە تۇسىنىكتەمە بەرمەدى.
وسىعان دەيىن پارسى شىعاناعىنىڭ ءۇش ەلى – باحرەين، ساۋد ارابيا جانە ءباا مەن ەگيپەت، مالديۆا ارالى، يەمەن جانە ليۆيا كاتارمەن ديپلوماتيالىق بايلانىستى ۇزگەن. ولار كاتاردى تەرروريستىك ۇيىمداردى قولداپ، اراب ەلدەرىن تۇراقسىزداندىرىپ وتىر دەپ ايىپتاعان.
كاتار سىرتقى ىستەر مينيسترلىگى بۇل ايىپتاۋلاردى جوققا شىعارعان.
