ق ر ۇلتتىق بانكى "ۇلتتىق قور – بالالارعا" باعدارلاماسى بويىنشا 18 جاسقا دەيىنگى بالالاردىڭ ءبىرىڭعاي جيناقتاۋشى زەينەتاقى قورىنداعى (بجزق) شوتتارىنا كەزەكتى جىل سايىنعى قارجى اۋدارىلعانىن حابارلادى، دەپ جازادى Dalanews.kz.
"باعدارلاما اياسىندا ءار بالاعا 129،38 اقش دوللارى ءبولىندى. بارلىق قاتىسۋشىعا تولەنگەن جالپى سوما 888،8 ملن اقش دوللاردى قۇرادى. 2024 جىلدىڭ اياعىندا باعدارلاماعا قاتىسۋشى بالا سانى 6 921 035 بولدى"، دەلىنگەن ۇلتتىق بانكتىڭ حابارلاماسىندا.
ەستەرىڭىزگە سالا كەتەيىك، "ۇلتتىق قور – بالالارعا" باعدارلاماسى اياسىنداعى العاشقى تولەمدەر 2024 جىلى جۇرگىزىلگەن ەدى. ول كەزدە ءار بالاعا 100،52 اقش دوللارى بولىنگەن. بۇل قاراجات – قازاقستان رەسپۋبليكاسى ۇكىمەتىنىڭ 18 جاسقا تولماعان بالالارعا اۋداراتىن مىندەتتەمەسى.
باعدارلاما ىسكە قوسىلعان ەكى جىل ىشىندە ءار بالاعا جالپى 232،94 اقش دوللارى جيناقتالدى.
جىل سايىنعى اۋدارىم مولشەرى ۇلتتىق قوردىڭ شەتەل ۆاليۋتاسىنداعى اكتيۆتەرىنە جانە ونىڭ ۇزاقمەرزىمدى ينۆەستيسيالىق تابىسىنا بايلانىستى بولادى. قاراجاتتىڭ جارتىسى وسى تابىستان بولىنەدى. سونىمەن قاتار، بالالاردىڭ شوتىنا اۋدارىلعان قاراجات ۇلتتىق قوردىڭ ينۆەستيسيالىق پورتفەلىندە ساقتالىپ، قوسىمشا تابىس اكەلەدى.
بالاڭىزدىڭ شوتىن تەكسەرۋ ءۇشىن kids.enpf.kz سايتىنا كىرىپ، تۋۋ تۋرالى كۋالىگىندە كورسەتىلگەن جسن-دى تەرسەڭىز بولعانى.
