QR Ulttyq Banki "Ulttyq qor – balalarǵa" baǵdarlamasy boıynsha 18 jasqa deıingi balalardyń Biryńǵaı jınaqtaýshy zeınetaqy qoryndaǵy (BJZQ) shottaryna kezekti jyl saıynǵy qarjy aýdarylǵanyn habarlady, dep jazady Dalanews.kz.

"Baǵdarlama aıasynda ár balaǵa 129,38 AQSH dollary bólindi. Barlyq qatysýshyǵa tólengen jalpy soma 888,8 mln AQSH dollardy qurady. 2024 jyldyń aıaǵynda baǵdarlamaǵa qatysýshy bala sany 6 921 035 boldy", delingen Ulttyq Banktiń habarlamasynda.

Esterińizge sala keteıik, "Ulttyq qor – balalarǵa" baǵdarlamasy aıasyndaǵy alǵashqy tólemder 2024 jyly júrgizilgen edi. Ol kezde ár balaǵa 100,52 AQSH dollary bólingen. Bul qarajat – Qazaqstan Respýblıkasy Úkimetiniń 18 jasqa tolmaǵan balalarǵa aýdaratyn mindettemesi.

Baǵdarlama iske qosylǵan eki jyl ishinde ár balaǵa jalpy 232,94 AQSH dollary jınaqtaldy. 

Jyl saıynǵy aýdarym mólsheri Ulttyq qordyń shetel valútasyndaǵy aktıvterine jáne onyń uzaqmerzimdi ınvestısıalyq tabysyna baılanysty bolady. Qarajattyń jartysy osy tabystan bólinedi. Sonymen qatar, balalardyń shotyna aýdarylǵan qarajat Ulttyq qordyń ınvestısıalyq portfelinde saqtalyp, qosymsha tabys ákeledi.

Balańyzdyń shotyn tekserý úshin kids.enpf.kz saıtyna kirip, týý týraly kýáliginde kórsetilgen JSN-dy terseńiz bolǵany.