اقتوبە وبلىسىندا بولعان جول-كولىك وقيعاسى سالدارىنان بەس ادام قازا تاۋىپ، ءبىر ادام اۋىر جاعدايدا كوماعا ءتۇستى، دەپ حابارلايدى Dala News.
قايعىلى وقيعا بايعانين اۋدانىنىڭ ورتالىعى قاراۋىلكەلدى ماڭىندا بولعان. پوليسيا مالىمەتىنشە، تاس جولدا «ۆاز» بەن «DAF» كولىكتەرى سوقتىعىسقان.
سالدارىنان جەڭىل كولىكتىڭ جۇرگىزۋشىسى مەن ءتورت جولاۋشىسى وقيعا ورنىندا كوز جۇمدى. تاعى ءبىر جولاۋشى ءتۇرلى جاراقاتپەن اۋداندىق اۋرۋحاناعا جەتكىزىلگەن. دارىگەرلەر ونىڭ جاعدايىن اۋىر دەپ باعالاپ وتىر - ول كومادا جاتىر.
دەنساۋلىق ساقتاۋ باسقارماسى ناۋقاسقا كومەك كورسەتۋ ءۇشىن سانيتارلىق اۆياسيا ماماندارى تارتىلاتىنىن حابارلادى.
اتالعان دەرەك بويىنشا قىلمىستىق ءىس قوزعالىپ، وقيعانىڭ بارلىق ءمان-جايى انىقتالىپ جاتىر. پوليسيا جۇرگىزۋشىلەردى جولدا ساق بولۋعا شاقىردى.
