Aqtóbe oblysynda bolǵan jol-kólik oqiǵasy saldarynan bes adam qaza taýyp, bir adam aýyr jaǵdaida komaǵa tústi, dep habarlaidy Dala News.
Qaiǵyly oqiǵa Baiǵanin aýdanynyń ortalyǵy Qaraýylkeldi mańynda bolǵan. Politsiia málimetinshe, tas jolda «VAZ» ben «DAF» kólikteri soqtyǵysqan.
Saldarynan jeńil kóliktiń júrgizýshisi men tórt jolaýshysy oqiǵa ornynda kóz jumdy. Taǵy bir jolaýshy túrli jaraqatpen aýdandyq aýrýhanaǵa jetkizilgen. Dárigerler onyń jaǵdaiyn aýyr dep baǵalap otyr - ol komada jatyr.
Densaýlyq saqtaý basqarmasy naýqasqa kómek kórsetý úshin sanitarlyq aviatsiia mamandary tartylatynyn habarlady.
Atalǵan derek boiynsha qylmystyq is qozǵalyp, oqiǵanyń barlyq mán-jaiy anyqtalyp jatyr. Politsiia júrgizýshilerdi jolda saq bolýǵa shaqyrdy.
