ماڭعىستاۋ وبلىسىندا 26 كوللەدج بار. وندا 21 مىڭنان استام ستۋدەنت ءبىلىم الادى. ونىڭ 14 188ء-ى (67،5%) مەملەكەتتىك تاپسىرىس ەسەبىنەن وقيدى.
قازىرگى تاڭدا كوللەدجدەردە جۇمىسشى ماماندىقتارىنىڭ بەدەلىن ارتتىرۋعا باعىتتالعان باعدارلامالار ورىندالىپ جاتىر. ماسەلەن، «جاس مامان» جوباسى اياسىندا 35 ارنايى ءپان وقىتۋشىسى مەن 58 وندىرىستىك وقىتۋ شەبەرى ارنايى كۋرستان ءوتتى. ياعني، ولار وقۋ شەبەرحاناسىندا زاماناۋي قۇرىلعىمەن جۇمىس ىستەۋ بويىنشا تاجىريبە جيناقتادى. وبلىس كوللەدجدەرىندە 17 قۇزىرەتتىلىك ورتالىق، 22 شەبەرحانا، 11 زەرتحانا اشىلدى.
سونداي-اق 2022 جىلى دەمونستراسيالىق ەمتيحان ءوتتى. وسىلايشا، وقۋ ۇدەرىسىنە WorldSkills باعالاۋ جۇيەسى 40 پايىزعا ەنگىزىلدى. بيىل بۇل كورسەتكىشتى 80 پايىزعا جەتكىزۋ جوسپارلانىپ وتىر.
2023 جىلدان باستاپ ماڭعىستاۋ تۋريزم كوللەدجى ۇن ونىمدەرىن دايىنداۋدى قولعا الدى. مۇندا «اسپاز، كونديتەر» ماماندىعىنىڭ ستۋدەنتتەرى توقاش، تورت، قۇيماق سىندى ۇن ونىمدەرىن ازىرلەيدى.
سونىمەن قاتار كوللەدج تۋريزم سالاسىنداعى مامانداردى دا دايىندايدى. جىل سايىن جاستار Rixos Aktau-دا تاجىريبەدەن وتەدى.
– ماڭعىستاۋ تۋريزم كوللەدجى 2025 جىلى حالىقارالىق سالالىق اككرەديتاسيادان ءوتىپ، الەمدە سۇرانىسقا يە ماماندار دايارلاۋدى جوسپارلاپ وتىر. ورتا ارناۋلى ءبىلىم بەرۋ سالاسىنداعى تاعى ءبىر جاڭالىق - مەكتەپ وقۋشىلارىن ءۇش ماماندىق بويىنشا وقىتۋ. 2023-2024 جىلدارى 10-11-سىنىپتاردا وقيتىن 60 وقۋشى اقتاۋ تەحنولوگيالىق قىزمەت كورسەتۋ كوللەدجى مەن جاڭاوزەن قىزمەت كورسەتۋ جانە جاڭا تەحنولوگيالار كوللەدجىنىڭ بازاسىندا اۆتوسلەسار، گازبەن دانەكەرلەۋشى، تىگىنشى ماماندىقتارىن مەڭگەرەدى. ناتيجەسىندە، ولار ورتا ءبىلىم تۋرالى اتتەستاتپەن بىرگە كوللەدج اتتەستاتىنا يە بولادى. قازىرگى تاڭدا قاجەتتى نورماتيۆتىك-قۇقىقتىق قۇجاتتار راسىمدەلىپ، كاسىپتىك باعدار بەرۋ جۇمىستارى باستالىپ كەتتى، – دەيدى ماڭعىستاۋ وبلىستىق ءبىلىم باسقارماسى باسشىسىنىڭ ورىنباسارى گۇلبانۋ قىزىلعۇلوۆا.
ءوڭىر باسشىسى نۇرلان نوعايەۆ كوللەدجدەردەگى وقۋ كابينەتتەرىنىڭ ماتەريالدىق-تەحنيكالىق بازامەن جابدىقتالۋى جوعارى دەڭگەيدە بولۋ كەرەك ەكەنىن اتاپ ءوتتى.
– ءبىلىم سالاسىنداعى جۇمىستى تەڭ دارەجەدە ۇيىمداستىرۋ كەرەك. بايقاۋلاردا جۇلدەلى ورىن الماعان وقۋشىلار مەن ۇستازدار شەت قالماسىن. بارلىق ستۋدەنت ساپالى ءبىلىم الۋى كەرەك. سونداي-اق وقۋ ورىندارىن ماتەريالدىق-تەحنيكالىق بازامەن قامتاماسىز ەتۋگە قوماقتى قارجى ءبولىنىپ وتىر. بۇل ءوز كەزەگىندە وقۋشىلاردىڭ جاقسى ءبىلىم مەن تاربيە الۋىنا سەپتىگىن تيگىزەدى. ءبىراق، وكىنىشكە قاراي، الىنعان تەحنيكانىڭ پايدالانىلماي جاتقانىن كورىپ ءجۇرمىز. سوندىقتان ماتەريالدىق بازانى ءتيىمدى پايدالانۋدان قورىقپاڭىز. بۇل ستۋدەنتتەردىڭ ءبىلىم الۋىنا، تاجىريبە جيناقتاۋىنا جانە وسى ءبىلىمدى ەستە ساقتاۋىنا مۇمكىندىك بەرەدى. وسىنى ەسكەرۋىڭىزدى سۇرايمىن»، – دەدى وبلىس اكىمى نۇرلان نوعايەۆ.
