ەۋروپا، ازيا جانە تمد ەلدەرىندەگى حالىقارالىق پاندىك وليمپيادالاردا ءار ءتۇرلى دارەجەدەگى ماراپاتتارعا يە بولعان وقۋشىلاردىڭ پورترەتتەرى وبلىس ورتالىعىنىڭ LED ەكراندارىندا كورسەتىلە باستادى، سونداي-اق قالالىق بيلبوردتارعا ورنالاستىرىلدى.
نورۆەگيا استاناسى وسلودا وتكەن وقۋشىلار اراسىنداعى 63ء-شى حالىقارالىق ماتەماتيكالىق وليمپياداعا (IMO-2022) الەمنىڭ 104 ەلىنەن 600 ۆۋندەركيند بالا جينالدى. سونىڭ التاۋى قازاقستاننان قاتىستى.
اتالعان جارىستا اقتاۋ قالاسىنداعى "ءبىلىم-يننوۆاسيا" ليسەي-ينتەرناتىنىڭ 11 سىنىپ وقۋشىسى ءابۋ ادىلەت قولا مەدالعا يە بولدى.
وسى وقۋ ورنىنىڭ تۇلەگى سانجار نۇرعالييەۆ 10-18 شىلدە ارالىعىندا قىتايدىڭ تيانسزين قالاسىندا ونلاين رەجيمىندە وتكەن حيميا پانىنەن حالىقارالىق وليمپيادادا (IChO) ەكىنشى ورىن الدى.
اقتاۋ قالاسىنىڭ وقۋشىلارى ياكۋتسك قالاسىندا وتكەن فيزيكا، حيميا جانە ينفورماتيكا پاندەرى بويىنشا "تۋيماادا" حالىقارالىق وليمپياداسىنان دا جۇلدەلى ورىندارعا يە بولدى. وندا ءمۇعالىم ءالىبي مەن مولداعۇل ءادىلجان كۇمىس، نۇرقوجا وماربايەۆا قولا مەدال جەڭىپ الدى.
– جىل سايىن الەمنىڭ 100-دەن استام ەلىنىڭ كوماندالارى قاتىساتىن وليمپيادادا ءبىزدىڭ وقۋشىلار ءوز بىلىمدەرىن دالەلدەدى. حالىقارالىق دەڭگەيدە ولار وزدەرىنىڭ مىقتى ەكەندەرىن كورسەتتى. وسىعان بايلانىستى ءبىز وبلىس اكىمىنىڭ تاپسىرماسى بويىنشا وليمپيادا جەڭىمپازدارىنىڭ سۋرەتتەرىن قالا كوشەلەرىنە ورنالاستىرا باستادىق. بۇل تەك وقۋشىلاردىڭ عانا ەمەس، ولاردىڭ اتا-انالارى مەن ۇستازدارىنىڭ ۇلكەن ەڭبەگى، – دەپ اتاپ ءوتتى وبلىستىق ءبىلىم باسقارماسىنىڭ باسشىسى دينارا جۇماشيەۆا.
