اتىراۋداعى "ابىروي اۆتو" اۆتوسالونى 120-دان استام كليەنتتى الداپ سوقتى. سالون قىزمەتكەرلەرى اۆتوكولىكتى ءتيىمدى ساتۋ مەن 10 كۇن ىشىندە اقشانى قايتارۋعا ۋادە بەرگەن، ءبىراق ماشينالار جوعالىپ، ال تولەمدەر ءالى دە بەرىلمەگەن. زارداپ شەككەندەردىڭ ايتۋىنشا، اۆتوسالون كولىكتى ءوز اتىنا راسىمدەپ، ونى باسقا ايماقتارعا — اقتوبە، شىمكەنت جانە باتىس وڭىرلەرگە قايتا ساتىپ جىبەرگەن، دەپ حابارلايدى Dalanews.kz.

"ولار 10 كۇندە بارلىق سومانى قايتارامىز" دەپ سەندىردى. ءبىراق بىرنەشە اي ءوتتى، ماشينا باسقا قالاعا كەتكەن، ال ماعان "كۇت" دەۋمەن كەلەدى"، دەپ Atyrau Today كلينەتتەردىڭ ءبىرىنىڭ ءسوزىن كەلتىرەدى. 

شامامەن زيان كولەمى جۇزدەگەن ميلليون تەڭگەگە جەتۋى مۇمكىن. كوپتەگەن ادام وتباسىلارى ءۇشىن ماڭىزدى ساتىپ الۋ بولعان جالعىز كولىگىنەن وسىلايشا ايىرىلىپ، پوليسياعا بىرلەسىپ ارىزدانۋعا ءماجبۇر بولدى. ولار ءادىل تەرگەۋدى تالاپ ەتۋدە.

"قازىرگى ۋاقىتتا اۆتوسالون عيماراتىنا قۇلىپ سالىنىپ، جۇمىسىنا تىيىم سالىندى. يەلەرى ۇستالدى. "الاياقتىق" بابىمەن قىلمىستىق ءىس قوزعالدى. پوليسيا زيان كولەمىن انىقتاپ، باسقا ادامداردىڭ قاتىستىلىعىن تەكسەرۋدە"، دەلىنگەن وڭىرلىك پد تۇسىنىكتەمەسىندە.

بۇعان دەيىن الەۋمەتتىك جەلىدە تاراپ جاتقان جەڭىلدەتىلگەن اۆتونەسيەلەۋ باعدارلاماسىنىڭ جاڭارتىلعانى تۋرالى اقپارات فەيك ەكەنىن ەسكەرتكەنبىز.