اقش پەن جۇڭگو وكىلدەرى وسى اپتادا كەلىسسوزدەر وتكىزىپ، الەمنىڭ ەكى الپاۋىتى اراسىنداعى ساۋدا سوعىسىن باسەڭدەتۋگە تىرىسپاق. بۇل تۋرالى BBC مالىمدەدى، دەپ حابارلايدى Dalanews.kz.

كەلىسسوز شۆەيساريادا وتپەك. جۇڭگو تاراپىنان قحر مەملەكەتتىك كەڭەسىنىڭ ۆيسە-پرەمەرى حە ليفەن قاتىسادى، ال اقش دەلەگاسياسىن قارجى ءمينيسترى سكوتت بەسسەنت پەن اقش-تىڭ ساۋدا وكىلى دجەيميسون گرير باسقارادى.

بۇل — بيىل قاڭتاردا جۇڭگو ۆيسە-پرەزيدەنتى حان چجەن اقش پرەزيدەنتى دونالد ترامپتىڭ يناۋگۋراسياسىنا قاتىسقالى بەرى ەكى ەل اراسىنداعى العاشقى جوعارى دەڭگەيدەگى كەزدەسۋ بولماق.

سكوتت بەسسەنتتىڭ ايتۋىنشا، كەلىسسوزدىڭ باستى ماقساتى — حالىقارالىق ەكونوميكالىق جۇيەدە تەپە-تەڭدىك ورناتىپ، ونى اقش مۇددەسىنە ساي ەتۋ.

"بۇل جولى ءىرى ساۋدا كەلىسىمىنە قول جەتكىزەمىز دەپ ويلامايمىن. بىزگە ەڭ الدىمەن شيەلەنىستى باسەڭدەتۋ قاجەت. سوندا عانا العا جىلجي الامىز"، — دەدى ول.

قىتايدىڭ مەملەكەتتىك باق-تارى پەكين بۇل قادامدى الەمدىك ءۇمىتتى، ەل مۇددەسىن جانە امەريكالىق بيزنەس وكىلدەرىنىڭ وتىنىشتەرىن ەسكەرە وتىرىپ قابىلداعانىن جازدى.

"ەگەر اقش بۇل ماسەلەنى كەلىسسوز ارقىلى شەشكىسى كەلسە، وندا وزدەرى ەنگىزگەن ءبىرجاقتى تاريفتەردىڭ جاعىمسىز سالدارىمەن بەتپە-بەت كەلۋگە دايىن بولۋلارى كەرەك. بۇل تەك اقش-قا ەمەس، بۇكىل الەمگە اسەر ەتەدى"، — دەدى قىتايدىڭ ساۋدا مينيسترلىگىنىڭ وكىلى.

ايتا كەتەيىك، اقش پرەزيدەنتى دونالد ترامپ قىتايدان اكەلىنەتىن تاۋارلارعا 145%-عا دەيىن جاڭا كەدەندىك باج سالىعىن ەنگىزدى. پەكين دە قاراپ قالماي، اقش-تان كەلەتىن كەيبىر ونىمدەرگە 125% مولشەرىندە جاۋاپتىق تاريفتەر ەنگىزدى.

ساراپشىلاردىڭ ايتۋىنشا، الدا كۇتىپ تۇرعان كەلىسسوزدەر بىرنەشە ايعا سوزىلۋى مۇمكىن.