AQSH pen Qytaı ókilderi osy aptada kelissózder ótkizip, álemniń eki alpaýyty arasyndaǵy saýda soǵysyn báseńdetýge tyryspaq. Bul týraly BBC málimdedi, dep habarlaıdy Dalanews.kz.
Kelissóz Shveısarıada ótpek. Qytaı tarapynan QHR Memlekettik keńesiniń vıse-premeri He Lıfen qatysady, al AQSH delegasıasyn Qarjy mınıstri Skott Bessent pen AQSH-tyń saýda ókili Djeımıson Grır basqarady.
Bul — bıyl qańtarda Qytaı vıse-prezıdenti Han Chjen AQSH prezıdenti Donald Tramptyń ınaýgýrasıasyna qatysqaly beri eki el arasyndaǵy alǵashqy joǵary deńgeıdegi kezdesý bolmaq.
Skott Bessenttiń aıtýynsha, kelissózdiń basty maqsaty — halyqaralyq ekonomıkalyq júıede tepe-teńdik ornatyp, ony AQSH múddesine saı etý.
"Bul joly iri saýda kelisimine qol jetkizemiz dep oılamaımyn. Bizge eń aldymen shıelenisti báseńdetý qajet. Sonda ǵana alǵa jyljı alamyz", — dedi ol.
Qytaıdyń memlekettik BAQ-tary Pekın bul qadamdy álemdik úmitti, el múddesin jáne amerıkalyq bıznes ókilderiniń ótinishterin eskere otyryp qabyldaǵanyn jazdy.
"Eger AQSH bul máseleni kelissóz arqyly sheshkisi kelse, onda ózderi engizgen birjaqty tarıfterdiń jaǵymsyz saldarymen betpe-bet kelýge daıyn bolýlary kerek. Bul tek AQSH-qa emes, búkil álemge áser etedi", — dedi Qytaıdyń Saýda mınıstrliginiń ókili.
Aıta keteıik, AQSH prezıdenti Donald Tramp Qytaıdan ákelinetin taýarlarǵa 145%-ǵa deıin jańa kedendik baj salyǵyn engizdi. Pekın de qarap qalmaı, AQSH-tan keletin keıbir ónimderge 125% mólsherinde jaýaptyq tarıfter engizdi.
Sarapshylardyń aıtýynsha, alda kútip turǵan kelissózder birneshe aıǵa sozylýy múmkin.
