اقمولا وبلىسىندا اكە مەن بالا ناعىز ەرلىك جاسادى. ءبىرجان سال اۋدانى ۇلگى اۋىلىنىڭ تۇرعىندارى ورتەنىپ جاتقان ۇيدەن ءۇش بالانى قۇتقارىپ قالدى دەپ حابارلايدى Dalanews.kz.24.kz سايتىنا سىلتەمە جاساپ.
تەلەارنا مالىمەتىنشە، ءورت كوپ بالالى انا يۋليا چەركاسسكويدىڭ ءۇيىن شارپىعان. ءورت شىققان كەزدە ۇيدە بەس كامەلەتكە تولماعان بالا بولعان. ولاردىڭ ەكەۋى ءوز بەتتەرىمەن سىرتقا شىعىپ ۇلگەرگەن. قالعاندارىنا كومەككە اۋىل تۇرعىنى ەرلان توقسانبايەۆ پەن ونىڭ ۇلى ميراس كەلگەن.
انىقتالعانداي، توقسانبايەۆتىڭ ۇلى- بولاشاق قۇتقارۋشى. ولار ساناۋلى مينۋتتار ىشىندە وتقا ورانعان ۇيدەن ءۇش بالانى الىپ شىققان.
«مەن بىردەن گاز باللوندى سىرتقا شىعارىپ، كابەلدى اجىراتتىم. قولىمدا تىرما بولدى، سول ارقىلى ەسەپتەگىشتى توقتاتتىم. سودان كەيىن ءۇيدىڭ ارتقى بولمەسىن بۇزا باستادىق. تەرەزەنى سىندىردىق، ءبىر بالا سىرتقا شىقتى دا: «وندا ەشكىم جوق»،- دەدى. مەن وعان ايقايلادىم: «شىق، ولار وسىندا». سودان كەيىن ۇشەۋىن تەرەزەدەن شىعارا باستادىق. بىرەۋى تەرەزە الدىندا بولدى، ەكەۋى ار جاقتا بولعان»،- دەدى ەرلان توقسانبايەۆ.
بالالار قۇتقارىلعاننان بىرنەشە مينۋت وتكەن سوڭ ۇيدە قالعان گاز باللوندار جارىلىپ كەتكەن. وقيعا ورنىنا كەلگەن ءورت سوندىرۋشىلەر وتتى جەدەل وشىرگەن.
ءورت سوندىرۋشىلەردىڭ ايتۋىنشا، ءورتتىڭ شىعۋ سەبەبى- قىسقا تۇيىقتالۋ بولعان. قۇتقارۋشىلاردىڭ اتاپ وتۋىنشە، توقسانبايەۆتار وتباسىنىڭ باتىل ارەكەتىنىڭ ارقاسىندا ءورت كەزىندە ەشكىم زارداپ شەككەن جوق.
قازىرگى ۋاقىتتا زارداپ شەككەن وتباسىعا ماتەريالدىق كومەك كورسەتىلىپ، باسپانا ماسەلەسى شەشىلىپ جاتىر. ەرلان مەن ميراس توقسانبايەۆتار مەملەكەتتىك ناگراداعا ۇسىنىلدى.
