القالى جيىنعا وبلىس اكىمىنىڭ ورىنباسارى ۇ.سادىبەكوۆ، وبلىستىق، قالالىق، اۋداندىق ارداگەرلەر كەڭەستەرى ءتوراعالارى، زيالى قاۋىم وكىلدەرى مەن ءدىن سالاسىنىڭ قىزمەتكەرلەرى، توبە بيلەر، ۇكىمەتتىك ەمەس ۇيىمدار مەن ايەلدەر قاۋىمداستىعى جانە بۇقارالىق اقپارات قۇرالدارىنىڭ باسشىلارى قاتىستى.
قاتىسۋشىلار ءدىن مەن ءداستۇردىڭ اراسىنا جىك سالىپ جۇرگەن كەيبىر توپتاردىڭ ارەكەتتەرىنە قارسى تۇرۋ جايىنا توقتالدى. ماسەلەن، ءوز وتانداستارىنىڭ، باۋىرلارىنىڭ اراسىندا الاۋىزدىق تۋدىرىپ، وزگە تۇگىلى، ءوز اتا-اناسىن كاپىر ساناپ، ورتاعا تەرىس اسەر ەتىپ جۇرگەندەردىڭ قوعامعا ءقاۋىپ ءتوندىرىپ كەلە جاتقانى اڭگىمە ارقاۋىنا اينالدى. ءوز كەزەگىندە وبلىس اكىمىنىڭ ورىنباسارى ۇلت بولىپ قالىپتاسقالى بەرى جيناقتالعان سان عاسىرلىق قۇندىلىقتاردى، ءداستۇرلى ءدىندى كەيبىرەۋلەردىڭ تەرىسكە شىعارۋعا ۇمتىلعانى ورىنسىز ەكەنىن جەتكىزدى.
«قازاق حالقىنىڭ ۇلتتىق ۇعىمىمەن ۇشتاسقان يسلام ءدىنى ەشۋاقىتتا ءداستۇردى تەرىسكە شىعارعان ەمەس. سوندىقتان دا مۇسىلمان قاۋىمىنا جاتاتىن ءاربىر ۇلتتىڭ ۇلت بولىپ قالىپتاسۋىنداعى سالت-داستۇرلەرى مەن ادەت-عۇرىپتارىن دىننەن بولەك، ءدىني نانىم-سەنىمدەرىنەن اجىراتىپ، ءبىرىن ەكىنشىسىنەن وقشاۋلاپ قاراۋ مۇمكىن ەمەس»، – دەدى ۇلاسبەك سادىبەك ۇلى.
سونداي-اق، جيىندا قازاقستان مۇسىلماندارى ءدىني باسقارماسى تاراپىنان ءداستۇرلى ءدىنىنىڭ قۇندىلىقتارىن حالىق اراسىندا ناسيحاتتاپ، ءدىن مەن ءداستۇر بايلانىسىن نىعايتا ءتۇسۋ جولىندا اتقارىلعان يگى ىستەر ايتىلدى. الايدا، اتالعان ماسەلەلەنى شەشۋگە بۇل شارۋالار ازدىق ەتەتىنى، ونىمەن قوعام بولىپ كۇرەسۋ كەرەك ەكەنىن ايتتى جينالعاندار.
ماسەلەن، قوعامداعى ءدىني راسىمدەر مەن جورالعىلاردى جۇرگىزۋ بارىسىندا ىسىراپشىلدىققا جول بەرمەۋ، مازاراتتاردى كۇتىپ ۇستاۋ ماسەلەلەرىمەن زيالى قاۋىم وكىلدەرى اينالىسۋ كەرەكتىگى ءسوز بولدى. سونىمەن قاتار قازاقستان مۇسىلماندارى ءدىني باسقارماسى بەكىتكەن «جانازا جانە ءدىني راسىمدەر» كىتابىن كومەكشى قۇرال رەتىندە پايدالانۋ ۇسىنىلدى.
وقو اكىمىنىڭ باسپا ءسوز قىزمەتى
