"بٷگٸن – قازاق جۋرناليستيكاسى ٷشٸن قارالى كٷن. كەسٸبي جۋرناليست, حالىقتىڭ سٷيٸكتٸ پەرزەنتٸ نۇرتٸلەۋ يمانعاليۇلى جايلى قارا حابار ەستۋ مەن ٷشٸن ٶتە اۋىر بولدى.
سەنگٸم كەلمەدٸ. جارقىن بەينەسٸ كٶز الدىما كەلە قالدى. ول مەن ٷشٸن ەڭ الدىمەن عاجايىپ دوس ەدٸ. اقتارىلىپ جٷرەتٸن اقەدٸل ازامات ەدٸ. كٶڭٸلٸ كٶل, پەيٸلٸ كەڭ ەردٸڭ ەل ٷشٸن اتقارار ەڭبەگٸ ەلٸ الدا ەدٸ. بەرگەنٸنەن بەرەرٸ كٶپ ەدٸ.
ول جٷرگٸزگەن باعدارلامالار حالىقتىڭ جٷرەگٸنەن ورىن الدى. الماتى وبلىسى دەسە, ٶزٸنٸڭ تۋعان جەرٸ دەسە, ٷنەمٸ ەلەڭدەپ تۇراتىن.
ٶڭٸردەگٸ بارلىق رۋحاني, مەدەني شارالاردىڭ باسى-قاسىندا جٷرٸپ, اتالى سٶز ايتاتىن. ەلەۋمەتكە قاراتا كەلەلٸ وي, كەستەلٸ سٶز ارناپ, تاعىلىم تيەگٸن اعىتاتىن.
ٷزەڭگٸلەس دوسىمنىڭ قازاسى قابىرعامدى قايىستىردى. بٷكٸل ەل-جۇرتقا ەزٸلٸپ وتىرىپ كٶڭٸل ايتامىن. باقۇل بول, دوس, اردا ازامات, مىقتى جۋرناليست!", – دەپ جازدى باتالوۆ جەلٸدەگٸ پاراقشاسىندا.
نۇرتٸلەۋ يمانعاليۇلى “قۇرداستار”, “جاستار داۋىسى”, “اراي”, “جادىڭدا ما, جولداس”, “اينا”, “جاس جٸگەر”, “بەتپە-بەت”, “قولتاڭبا”, “دٸڭگەك”, “كٶرشٸلەر”, “زاڭ سٶيلەسٸن”, “Nur-Tiley” اۆتورلىق باعدارلامالارى ارقىلى قالىڭ كٶرەرمەن ەسٸندە قالدى.
Dalanews.kz پورتالىنىڭ ۇجىمى نۇرتٸلەۋ يمانعاليۇلىنىڭ جاقىندارى مەن تۋعان-تۋىستارىنا قايىعىرىپ كٶڭٸل ايتادى. بٷگٸن "قازاقستان" ۇلتتىق ارناسىنىڭ ەفيرٸنەن ەستەلٸك حابارلار مەن ارنايى جوبالار بەرٸلەدٸ.
نۇرتٸلەۋ يمانعاليۇلى يمانعاليەۆ 1952 جىلى الماتى وبلىسى, اقسۋ اۋدانى, دٸڭگەك اۋىلىندا دٷنيەگە كەلگەن.
ٷيدەگٸ 14 بالانىڭ كەنجەسٸ. اتاسى – قالياسقار, بەس جاسىندا ساۋاتىن اشقان. «قازاقستان رترك» اق باسقارما تٶراعاسىنىڭ كەڭەسشٸسٸ, قازاقستان جۋرناليستەر وداعى سىيلىعىنىڭ ەكٸ مەرتە لاۋرەاتى, «التىن جۇلدىز» سىيلىعىنىڭ يەگەرٸ, قر مەدەنيەتٸنە ەڭبەگٸ سٸڭگەن قايراتكەر, قازاق ۇلتتىق ٶنەر اكادەميياسىنىڭ كۇرمەتتٸ پروفەسسورى, اقسۋ اۋدانىنىڭ «قۇرمەتتٸ ازاماتى».
1977 جىلى قازمۋ-دٸ بٸتٸرگەن قازاق تەلەۆيزيياسىندا تٸلشٸ, رەداكتور, اعا رەداكتور, كوممەنتاتور, باس رەداكتور, ساياسي شولۋشى, ديرەكتوردىڭ ورىنباسارى, «حابار» اگەنتتٸگٸندە مودەراتور-جٷرگٸزۋشٸ, ودان كەيٸن ٷكٸمەت كەڭسەسٸندە سەكتور مەڭگەرۋشٸسٸ, پرەزيدەنت ەكٸمشٸلٸگٸندە باس مامان بولىپ ٸستەگەن. كوررۋپتسيياعا قارسى كٷرەس جٶنٸندەگٸ مەملەكەتتٸك كوميسسيياسىنىڭ مٷشەسٸ. «قازاقستان» رترك» اق باسقارما تٶراعاسى قىزمەتٸن اتقارعان.
ن.يمانعاليۇلى تەلەجۋرناليستيكادان اينىماعان تۇلعا. سانالى عۇمىرىنىڭ 35 جىلىن تەلەۆيزيياعا ارناعان.
