"Búgin – Qazaq jýrnalistikasy úshin qaraly kún. Kásibi jýrnalist, halyqtyń súiikti perzenti Nurtileý Imanǵaliuly jaily qara habar estý men úshin óte aýyr boldy.
Sengim kelmedi. Jarqyn beinesi kóz aldyma kele qaldy. Ol men úshin eń aldymen ǵajaiyp dos edi. Aqtarylyp júretin aqedil azamat edi. Kóńili kól, peiili keń erdiń el úshin atqarar eńbegi áli alda edi. Bergeninen bereri kóp edi.
Ol júrgizgen baǵdarlamalar halyqtyń júreginen oryn aldy. Almaty oblysy dese, óziniń týǵan jeri dese, únemi eleńdep turatyn.
Óńirdegi barlyq rýhani, mádeni sharalardyń basy-qasynda júrip, ataly sóz aitatyn. Áleýmetke qarata keleli oi, kesteli sóz arnap, taǵylym tiegin aǵytatyn.
Úzeńgiles dosymnyń qazasy qabyrǵamdy qaiystyrdy. Búkil el-jurtqa ezilip otyryp kóńil aitamyn. Baqul bol, dos, arda azamat, myqty jýrnalist!", – dep jazdy Batalov jelidegi paraqshasynda.
Nurtileý Imanǵaliuly “Qurdastar”, “Jastar daýysy”, “Arai”, “Jadyńda ma, joldas”, “Aina”, “Jas jiger”, “Betpe-bet”, “Qoltańba”, “Dińgek”, “Kórshiler”, “Zań sóilesin”, “Nur-Tiley” avtorlyq baǵdarlamalary arqyly qalyń kórermen esinde qaldy.
Dalanews.kz portalynyń ujymy Nurtileý Imanǵaliulynyń jaqyndary men týǵan-týystaryna qaiyǵyryp kóńil aitady. Búgin "Qazaqstan" Ulttyq arnasynyń efirinen estelik habarlar men arnaiy jobalar beriledi.
Nurtileý Imanǵaliuly Imanǵaliev 1952 jyly Almaty oblysy, Aqsý aýdany, Dińgek aýylynda dúniege kelgen.
Úidegi 14 balanyń kenjesi. Atasy – Qaliasqar, bes jasynda saýatyn ashqan. «Qazaqstan RTRK» AQ Basqarma tóraǵasynyń keńesshisi, Qazaqstan Jýrnalister odaǵy syilyǵynyń eki márte laýreaty, «Altyn Juldyz» syilyǵynyń iegeri, QR mádenietine eńbegi sińgen qairatker, Qazaq Ulttyq Óner akademiiasynyń kurmetti professory, Aqsý aýdanynyń «Qurmetti Azamaty».
1977 jyly QazMÝ-di bitirgen Qazaq televiziiasynda tilshi, redaktor, aǵa redaktor, kommentator, bas redaktor, saiasi sholýshy, direktordyń orynbasary, «Habar» agenttiginde moderator-júrgizýshi, odan keiin Úkimet keńsesinde sektor meńgerýshisi, Prezident Ákimshiliginde bas maman bolyp istegen. Korrýptsiiaǵa qarsy kúres jónindegi memlekettik komissiiasynyń múshesi. «Qazaqstan» RTRK» AQ Basqarma Tóraǵasy qyzmetin atqarǵan.
N.Imanǵaliuly telejýrnalistikadan ainymaǵan tulǵa. Sanaly ǵumyrynyń 35 jylyn televiziiaǵa arnaǵan.
