– بۇل داۋ 2017 جىلى تۇتانعان بولاتىن. سول كەزدە كوللەدجٸمٸزدەگٸ تاەكۆوندوشىلاردى دايىندايتىن ەكٸ باپكەرٸمٸز ەسبول سۇلتانبەكوۆ پەن تٶلەگەن تٶلەمۇراتوۆ سٶزگە كەلٸسپەي قالادى. سول سەتتە تٶلەگەن ەسبولعا قول كٶتەرەدٸ, بۇدان كەيٸن ەسبول قاراپ قالسىن با, ول دا قارىمتاسىن قايتارادى.
وقيعا بولعان كٷنٸ كەشكە قاسىنا ەكٸ شەكٸرتٸن ەرتٸپ تٶلەگەن مەنٸڭ ٷيٸمە كەلٸپ, بولعان جايتتى باياندادى.
سودان كەيٸن وعان باسۋ ايتىپ, بۇل مەسەلەنٸ جۇمىسقا بارعاندا تالقىلايتىنىمدى ايتىپ, شىعارىپ سالدىم. ول مەنٸمەن كەزدەسكەننەن كەيٸن جارتى ساعاتتىڭ ٸشٸندە ون بەس شاقتى اتا-انانى جيناپ, «31 ارنانىڭ» جۋرناليستەرٸن شاقىرىپ, «رەسپۋبليكالىق سپورت كوللەدجٸندە باپكەردٸ ساباپ جاتىر» دەپ جۇرتتى شۋلاتقان بولاتىن.
مەن كەيٸننەن ويلانعاندا بۇل ٸستٸڭ و باستان ماعان قارسى ۇيىمداستىرىلعان شارا ەكەنٸن تٷسٸنگەندەي بولدىم. ٶزٸڭٸز ويلاڭىزشى, تٶلەگەن مەنەن اراشا سۇراپ كەلگەننەن كەيٸن ونى قولداپ نەمەسە داتتاپ ەشتەڭە ايتقان جوقپىن. ەرتەسٸ جۇمىسقا بارعاننان كەيٸن بۇل مەسەلەنٸ تالقىلايتىنىمىزدى ايتتىم.
ال تٶلەگەن بولسا, تاڭ اتقانىن كٷتپەي بٸر ساعاتتىڭ ٸشٸندە ٶزٸ جاتتىقتىراتىن بالالاردىڭ اتا-انالارى مەن «31 ارنا» جۋرناليستەرٸن جيناپ, شۋ شىعارعانىن تٷسٸنە المادىم. كەيٸننەن ويلاعانىمدا تٶلەگەننٸڭ قولىمەن وت كٶسەپ جٷرگەن ادامداردىڭ بار ەكەنٸن بٸلدٸم.
– ولار كٸمدەر, قۇپييا بولماسا ايتساڭىزشى?
– ولاردىڭ اتى-جٶنٸن جارييا ەتٸپ, بٸتپەس داۋدىڭ شەتٸن شىعارۋعا قۇلقىم جوق.
– ەكٸ باپكەردٸڭ «تٶبەلەسٸنەن» كەيٸن قانداي شارا قابىلدادىڭىز?
– باپكەرلەردٸڭ ٶزارا شەكٸسٸپ, بٸر-بٸرٸنە قول كٶتەرۋٸ ەدەپكە سىيمايتىن قىلىق قوي. سودان كوللەدجدٸڭ پەداگوگيكالىق كەڭەستە ولاردىڭ مەسەلەسٸن تالقىلاپ, ەكۋٸنە سٶگٸس جارييالاپ, قالىپتاسقان جاعدايدى بٸلٸم سالاسىن باقىلايتىن تيٸستٸ ورىندارعا حابارلادىق. ەكۋٸندە ۋاقىتشا جۇمىستان شەتەتتٸك.
كەيٸننەن سٶزگە كەلگەن ەكٸ باپكەرٸمٸز دە جاس, سول سەبەپتٸ ولاردىڭ ەرەكەتٸنە كەشٸرٸممەن قاراپ, كەيٸننەن ەكەۋٸن دە جۇمىسقا قايتا قابىلدادىم. «ەر شەكسپەي, بەكٸسپەيدٸ» دەپ اتا-بابامىز ايتقان عوي.
بٸراق ەكەۋٸنٸڭ اراسىنداعى داۋ ۇلعايا تٷستٸ. تٶلەگەن ٶزٸ جاتتىقتىراتىن بالالاردى بٶلٸپ الىپ, ولاردى وسى كٷنگە دەيٸن جۇرتتان بٶلەكتەۋمەن بولدى. كٷنٸ كەشە عانا ەلەۋمەتتٸك جەلٸ ارقىلى مەلٸمدەمە جاساعان بالالار كوللەدجدەگٸ ٶزگە وقىتۋشىلارمەن امانداسپايتىن دەرەجەگە جەتتٸ.
– ەلەۋمەتتٸك جەلٸ ارقىلى كوللەدج بەن سٸزدٸڭ اتىڭىزعا سىن ايتقان باپكەر تٶلەگەن تٶلەمۇراتوۆتىڭ كەسٸبي بٸلٸكتٸلٸگٸ جايىندا نە ايتا الاسىز? ول ٶز ايىپتاۋىندا كوللەدج باسشىلىعى ەڭبەگٸن باعالاماي, جاپا شەگٸپ جٷرگەن ادام رەتٸندە كٶرسەتتٸ. ونىڭ ويىمەن كەلٸسەسٸز بە?
– كەلٸسپەيمٸن. بٸرٸنشٸدەن, تٶلەگەن سپورت شەبەرٸ ەمەس. ول مىقتى سپورتشى بولسا, تاەكۆوندودان قازاقستاننىڭ ۇلتتىق قۇراماسىنىڭ قاتارىندا ٶنەر كٶرسەتٸپ, ٶزٸنٸڭ مىقتىلىعىن دەلەلدەر ەدٸ.
ول ەلەۋمەتتٸك جەلٸدەگٸ مەلٸمدەمەسٸندە ٷلكەن سپورتتا ٶزٸن كٶرسەتە الماعاندا كەيبٸر سپورتشىلار باپكەرلٸكتە جوعارى جەتٸستٸككە جەتەتٸنٸن ايتىپتى. ەڭگٸمەنٸڭ اشىعىن ايتسام, تٶلەگەن ٶزٸ ايتقانداي سپورتتا دا, باپكەرلٸكتە دە جوعارى نەتيجەگە قول جەتكٸزبەگەن ادام.
ال كوللەدجدەگٸ تاەكۆوندوشىلاردى جاتتىقتىرىپ جٷرگەن اعا جاتتىقتىرۋشى ەسبول سۇلتانبەكوۆتٸڭ كەسٸبي بٸلٸكتٸلٸگٸ جوعارى. تاەكۆوندو فەدەراتسيياسىنىڭ شىعارعان رەيتينگٸسٸنە كٶز سالساڭىز, ونىڭ دەل قازٸر تاەكۆوندو بويىنشا ٷزدٸك باپكەر ەكەنٸن بايقاۋعا بولادى. ونى كەز كەلگەن ادام ينتەرنەتتٸ اشىپ, كٶز جەتكٸزە الادى.
سونىمەن قاتار ول سپورت سالاسىندا دا كٶپتەگەن جەتٸستٸككە جەتكەن ازامات. قازاقستان بويىنشا تاەكۆوندودان 7 دٷركٸن چەمپيون بولعان. ال وسىنداي بٸلٸكتٸ ازاماتقا اعا جاتتىقتىرۋشىلىق قىزمەتتٸ قالاي سەنٸپ تاپسىرمايسىڭ. مەنٸڭشە, تٶلەگەننٸڭ كٶزدەگەن ماقساتى اعا جاتتىقتىرۋشى بولۋ.
يە, كەز كەلگەن ساربازدىڭ گەنەرال بولۋدى ارماندايتىنى – زاڭدى قۇبىلىس. ٶكٸنٸشكە وراي, ول مۇنداي مانساپقا ەڭبەك ەتٸپ جەتۋدٸڭ ورنىنا, شۋ شىعارىپ, اينالاسىن قارالاپ قول جەتكٸزۋ جولىن تاڭداعان سيياقتى.
– امالبەك مىرزا, تٶلەگەن ەلەۋمەتتٸك جەلٸدە جاستاردى حالىقارالىق جارىستارعا جٸبەرۋ ٷشٸن استىنداعى كٶلٸگٸن لومباردقا سالىپ, 800 مىڭ تەڭگەگە قارىزدانىپ, جارىسقا جٸبەرگەنٸن ايتىپتى. بۇل قانشالىقتى شىندىق?
– يە, ونىسىن مەن دە ەستٸدٸم. مۇنىسى ەندٸ شىلعي ٶتٸرٸك. كوللەدج قابىرعاسىندا جاستاردىڭ قانداي جارىستارعا قاتىساتىنى جايىندا كٷنٸ بۇرىن كٷنتٸزبەلٸك جوسپار دايىندالادى.
سول جوسپارعا سەيكەس مەملەكەتتٸڭ قارجىسىنىڭ ەسەبٸنەن بالالار جارىستارعا قاتىسىپ, ەل نامىسىن قورعايدى. بالالاردى جارىسقا اپارۋ مەسەلەسٸن باپكەر شەشپەيدٸ. ول جوسپار بويىنشا جٷزەگە اسادى.
ٶيتكەنٸ ەرتەڭگٸ كٷنٸ سپورتشى بەسەكەدە توپ جارىپ جاتسا, ونىڭ ابىرويى ايماق پەن كوللەدجگە ورتاق بولادى.
ال تٶلەگەننٸڭ كٶلٸگٸمدٸ لومباردقا ٶتكٸزٸپ, بالالاردى جارىسقا جٸبەردٸم دەگەنٸ قۇلاققا كٸرمەيتٸن ەڭگٸمە. كەرٸسٸنشە, ماعان تٶلەگەننٸڭ بٸر اتا-انالارعا حابارلاسىپ, بالالارىن جارىسقا اپارامىن دەپ اقشا العانى جايىندا شاعىم تٷستٸ. ونىڭ اق-قاراسى تەكسەرٸلەتٸن بولادى.
– بالالاردىڭ وقۋدان شىعارىلعانى جايىندا نە ايتا الاسىز?
– ەڭگٸمە باسىندا تٶلەگەننٸڭ ون بالانى وقشاۋلاپ, جاتتىقتىرعانىن ايتتىم عوي. ول سوڭعى ٷش جىلدا بەكەر جٷرمەي, جاس بالالاردى ازعىرىپ, كوللەدجگە قارسى قويۋمەن بولدى.
ٷستٸمٸزدەگٸ جىلدىڭ مامىر ايىنىڭ اياعىندا تٶلەگەن جاتتىقتىراتىن بالالاردىڭ اراسىندا ەكٸ قىز بالا بٸر-بٸرٸمەن تەجٸكەلەسٸپ, نارگيز احمەتجانوۆا دەگەن قىزدىڭ ٸشٸپ وتىرعان سۋسىنىنا نۇريزا تۇراروۆا ەسٸمدٸ قىز بەلگٸسٸز ۇنتاقتى سالىپ جٸبەرەدٸ. بۇدان سوڭ ەلگٸ قىزدىڭ اتا-اناسى تٶلەگەنگە كەلٸپ مەن-جايدى باياندايدى. ول مەسەلەنٸ شەشەتٸنٸن ايتىپ اتا-انانى شىعارىپ سالادى. بٸراق بولعان جايتتى تەربيەشٸگە نە بولماسا بٸزگە حابارلاماعان. ول وسىلايشا, بۇل ٸستٸ ۇمىتتىرىپ جٸبەرۋدٸ ويلاعان عوي.
ارادا 20 كٷننەن اسا ۋاقىت ٶتكەننەن كەيٸن اتا-انا ماعان بولعان جايتتى بايانداپ, تٶلەگەندٸ جۇمىستان شىعارۋ تۋراسىندا تالاپ قويدى. بۇدان كەيٸن ول كٸسٸگە بٸر اتا-انا ايتتى ەكەن دەپ مەسەلەنٸڭ اق-قاراسىن انىقتاماي جاتىپ باپكەردٸ جۇمىستان شىعارا المايتىنىمدى ايتتىم. بٸراق بۇل مەسەلەنٸ جابۋلى قازان كٷيٸندە قالدىرمايتىنىمدى اتا-اناعا تٷسٸندٸردٸم. سول كەزدە كوللەدجدەگٸ بالالاردىڭ بەرٸ جازعى دەمالىستا جٷرگەننەن كەيٸن بۇل ٸستٸ وقۋ جىلى باستالعاندا قولعا الاتىنىمىزدى ايتىپ, اتا-اناعا جازباشا تٷسٸنٸكتەمە بەردٸك. ارتىنشا, بۇل مەسەلەنٸ اتا-انالار كوميتەتٸندە تالقىلاپ, بولعان جايتتى كوللەدج باسشىلىعىنان 20 كٷننەن استام ۋاقىت بويى جاسىرعانى ٷشٸن تٶلەگەنگە سٶگٸس جارييالادىق.
ال ارادا بٸرشاما ۋاقىت ٶتكەننەن كەيٸن نارگيزدٸڭ اتا-اناسى تٶلەگەننٸڭ اتىنان ٸشكٸ ٸستەر ورىندارىنا ارىزداندى. وسىدان كەيٸن ماعان ٸشكٸ ٸستەر ورگاندارىنان اتا-انانىڭ شاعىمى بويىنشا ٸس قوزعاعاندارىن, ٸستٸڭ اق-قاراسى انىقتالعانشا زاڭ بويىنشا تٶلەگەندٸ جۇمىستان شەتتەتۋ تۋراسىندا حات جولدادى.
بۇدان كەيٸن مەن زاڭ تالابىنا مويىنسىنىپ, ونى جۇمىستان شەتتەتۋٸمە تۋرا كەلدٸ. مٸنە, سودان كەيٸن داۋ جاڭاشا قارقىن الىپ جٷرە بەردٸ. سول كٷنٸ تٶلەگەندٸ شاقىرىپ الىپ, ٸشكٸ ٸستەر ورگاندارىنىڭ تالابى بويىنشا جۇمىستان شەتتەتە تۇرۋعا قاتىستى شەشٸم قابىلداعانىمدى ايتىم. ول بۇدان كەيٸن زاڭ تالابىنا مويىنسىنىپ, كادر بٶلٸمٸنە بارىپ, بۇيرىقپەن تانىسىپ, قول قويۋى كەرەك ەدٸ. بولماسا بۇيرىقپەن كەلٸسپەيتٸنٸن اشىق ايتىپ, سوتقا شاعىمدانۋى كەرەك بولاتىن. بٸراق ول بۇل ەكەۋٸنٸڭ بٸرٸن دە ٸستەمەي, تاعى دا بالالار مەن اتا-انالاردى كوللەدج الدىنا جيناپ, داۋ كٶتەرۋگە كٸرٸستٸ. سودان بەرٸ جالعان اقپارات تاراتىپ, مەنٸ جٶنسٸز قارالاپ كەلەدٸ.
بۇدان كەيٸن بٸلٸم مينيسترلٸگٸندەگٸ, الماتى قالاسىنداعى جاسٶسپٸرٸم بالالاردىڭ ٸسٸمەن اينالىساتىن مەكەمەلەرگە بولعان جايتتى بايانداپ, بولعان ٸسكە قاتىستى باعاسىن بەرۋدٸ ٶتٸندٸم. ٶز كەزەگٸندە ولار تٶلەگەننٸڭ بالالاردىڭ قولىمەن وت كٶسەپ جٷرگەنٸ ورىنسىز ەكەنٸن ايتىپ, تٷسٸنٸكتەمە بەردٸ.
– تٶلەگەننٸڭ مەلٸمدەمەسٸن تىڭداعانىمىزدا سٸز ونىڭ ٷسٸتەنەن قىلمىستىق ٸس قوزعاتقانداي ەسەرگە قالدىق. سوندا ٸشكٸ ٸستەر ورگاندارىنا شاعىمدى اتا-انا تٷسٸرگەن بولىپ تۇر عوي?
– يە, ول مەلٸمدەمەسٸندە مەنٸڭ ٸشكٸ ٸستەر ورگاندارى قىزمەتكەرلەرٸمەن بٸرلەسٸپ ٸس قوزعاتقانداي سيپاتتاپ, شىندىققا سەيكەس كەلمەيتٸن ەڭگٸمەنٸ ايتىپ, ەلگە ٶزٸن جاپا شەگۋشٸ رەتٸندە كٶرسەتتٸ.
ال وعان بلوگەر ايگٷل ورىنبەك تە سەنٸپ قالعانىن بايقادىم. شىندىعىندا, تٶلەگەننٸڭ ٷستٸنەن شاعىمدى اتا-انا تٷسٸردٸ. بۇدان كەيٸن ٸشكٸ ٸستەر قىزمەتكەرلەرٸ زاڭ بويىنشا ٸس قوزعاپ, ونى ۋاقىتشا جۇمىستان شەتتەتۋ تۋراسىندا ماعان حات جولدادى.
سول ارالىقتا تٶلەگەن بالالاردى ۇيىمداستىرىپ, بٸزگە قارسى قويىپ, ەلەۋمەتتٸك جەلٸدەن مەلٸمدەمە جاساتتى. وسىدان كەيٸن قۇقىققورعاۋشىلار تٶلەگەندٸ جۇمىستان ۋاقىتشا بوساتۋدى بٸزدەن تالاپ ەتتٸ. ولاردىڭ تالابى زاڭعا قايشى كەلمەيدٸ. ونى كەز كەلگەن ادام بٸلەدٸ. ٶيتكەنٸ ايىپتالۋشى ٶزٸنٸڭ قىزمەتٸن پايدالانىپ, تەرگەۋگە كەدەرگٸ كەلتٸرمەۋٸ كەرەك.
مٸنە, وسىدان كەيٸن تٶلەگەننٸڭ باسىن اينالدىرىپ العان ون بالا ساباققا قاتىسپاي قويدى. اتا-انالارى بالالارىن ٷيلەرٸنە الىپ كەتٸپ, وقۋ مەن جاتتىعۋعا قاتىستىرمادى. وسى ارالىقتا بٸزدەر سپورتتا ٷلكەن جەتٸستٸككە جەتكەن يسلام بايرامۋكوۆ, نۇرباقىت تەڭٸزباەۆ سىندى ازاماتتاردى شاقىرىپ, بالالارعا ساباققا قاتىسۋلارىنىڭ قاجەت ەكەنٸن ايتىپ, تٷسٸندٸرۋگە تىرىستىق. ايتالىق, يسلام بايرامۋكوۆ ٶزٸنٸڭ ٷلكەن نەتيجەگە قول جەتكٸزۋ جولىندا ون شاقتى باپكەردٸڭ الدىن كٶرگەنٸن, كەسٸبي سپورت ٷشٸن باپكەرلەردٸڭ اۋىسۋى قالىپتى دٷنيە ەكەنٸن ايتىپ تٷسٸندٸردٸ.
نەتيجەسٸندە, ون بالانىڭ تٶرتەۋٸ ايتقان اقىلعا كٶنٸپ, بٷگٸندە ساباعىن جالعاستىرۋدا. بٸر قىز بالا ەكٸ ايدان بەرٸ اۋىرىپ جاتقانىن ايتىپ ساباققا قاتىسپاۋدا. ال تٶرت بالا «تٶلەگەن جۇمىسقا قابىلدانباسا, جاتتىعۋعا قاتىسپايمىز, بٸراق ساباققا قاتىسامىز» دەپ تابانداپ جاتىپ الدى.
بٸلٸم سالاسىنىڭ نورماتيۆتٸك اكتٸسٸ بويىنشا, بالا ون كٷننەن اسا ساباق پەن جاتتىعۋعا سەبەپسٸز قاتىسپاسا, وقۋدان شىعارۋعا تۋرا كەلەدٸ. سول تالاپ بويىنشا بٸزدەر 5 بالانى امالسىز وقۋدان شىعارۋعا مەجبٷر بولدىق.
تٶلەگەننٸڭ ارباۋىنا تٷسٸپ قالعان بالالار مەن اتا-انالار بولسا, «بٸزدٸڭ جاتتىقتىرۋشىمىزدى قايتارماساڭىزدار, ەلباسى مەن پرەزيدەنتكە, ٶزگە دە زاڭ ورىندارىنا شاعىمدانامىز» دەپ قوقان-لوقى كٶرسەتٸپ وتىر.
مەن ولارعا «شاعىمدانىڭىزدار, ول ٶز قۇقىقتارىڭىز» دەپ ايتىپ ەدٸم, ولار «تشانوۆ كٸمگە شاعىمدانساڭدار وعان شاعىمدانىڭدار» دەپ ايتتى ەڭگٸمە تاراتىپ, سٶزٸمنٸڭ تونىن تەرٸس اينالدىرىپ الىپتى. ەندٸ مەن ولارعا نە دەۋٸم كەرەك, تٷسٸنبەدٸم. مٸنە, ٷش جىلدان بەرٸ وسى داۋ-شاردىڭ سوڭىندا جٷرٸپ, بٸر قۇشاق قۇجات جينادىق. مەنٸڭ كەز كەلگەن بالا مەن اتا-انانىڭ الدىندا جٷزٸم جارىق. مۇنداي قۇقايدىڭ تالايىن كٶرگەن اداممىن.
سوندىقتان تٶلەگەننٸڭ اتا-انالار مەن بالالاردى العا سالىپ, بايبالام سالىپ كٶزدەگەن ماقساتىنا جەتەم دەۋٸ دالباسا. مەن داۋ ۋشىققان سەتتە حاتتاما جاساتىپ, زاڭ اياسىندا ەرەكەت ەتٸپ كەلەمٸن. بٸر قۇمالاق بٸر قارىن مايدى شٸرٸتەدٸ دەگەن وسى ەكەن.
– باپكەرلەردٸ جۇمىسقا قابىلداۋ ٸسٸنە اتا-انالار مەن وقۋشىلاردىڭ قاتىسى جوق شىعار?
– ەرينە, سونى اتا-انالارعا ايتىپ تٷسٸندٸرە المادىق. باپكەرلەر مەن وقىتۋشىلاردى جۇمىسقا قابىلداۋدىڭ ٶزٸندٸك جٶن-جوباسى بار. ولار تٷك تاپپاعان سوڭ, «تشانوۆ كوللەدجگە تۋعان-تۋىسقاندارىن جيناپ الىپتى» دەپ كٷيە جاققانىن ٶزدەرٸڭٸز دە ەستٸگەن شىعارسىز. بۇل ەندٸ – جالا.
ەندٸ تٶلەگەن ايگٷل ورىنبەك ەسٸمدٸ بلوگەردٸڭ جەكە پاراقشاسى ارقىلى مەنٸڭ اتىما قاتىستى تالاي اۋىر سٶزدەر ايتتى. مەنٸڭشە, ول قۇر سٶزبەن قۋىرداق قۋىرىپ, حالىقتىڭ ەموتسيياسىمەن ويناۋعا كٶشكەن سەكٸلدٸ.
ايگٷل قارىنداسىمىز قارسى تاراپتىڭ ويىن تىڭداپ الىپ, مەنٸ جەمقور دەپ ايىپتاعانى جانىما قاتتى باتتى. ول جاپقان جالاسى ٷشٸن سوت الدىندا جاۋاپ بەردٸ.
ايگٷل ورىنبەك باپكەر مەن اتا-انالارمەن سٶيلەسكەننەن كەيٸن كوللەدجگە كەلٸپ, مەن-جايدى سۇراسا بٸز ونىڭ كەۋدەسٸنەن يتەرمەس ەدٸك. قالاعان باپكەر, قالاعان بالامەن سٶيلەسەر ەدٸ. ايگٷلدٸڭ ٶزٸ زاڭگەر ەكەن. زاڭگەر ادام كەز كەلگەن داۋ-شاردىڭ ەكٸ ۇشى بولاتىنىن بٸلۋٸ تيٸس قوي. ول ٶزٸنٸڭ ورىنسىز ايىپتاۋلارمەن كوللەدجدەگٸ باپكەرلەرگە تٸل تيگٸزٸپ, جۇمىستارىن ٸسكە العىسىز قىلدى.
ەلەۋمەتتٸك جەلٸ ارقىلى تٸكەلەي ەفيرگە شىعىپ, جۇرت الدىندا بىلايشا ۇپاي جياۋدىڭ نە قاجەتٸ بار? ونىڭ ەدٸلەتسٸزدٸك, جەمقورلىق ٸستەرمەن كٷرەسٸپ جٷرگەنٸن قولدايمىن. بٸراق ٸستٸڭ بايىبىنا بارماي جاتىپ, وتقا ماي قۇيعانىن اقىلعا جەڭدٸرە المادىم.
مەن كەز كەلگەن ۋاقىتتا سوت الدىندا ٶزٸمنٸڭ اق ادال ەكەنٸمدٸ دەلەلدەپ بەرە الامىن. قازاقى كەڭشٸلٸككە سالىپ, جاس جٸگٸت تٷزەلەتٸن شىعار دەپ ٷمٸتتەنٸپ ەدٸم. بۇل ەرەكەتٸمنٸڭ قاتە بولعانىن ەندٸ تٷسٸنٸپ وتىرمىن. الداعى ۋاقىتتا ماعان كٷيە جاققان جانداردىڭ بەرٸ ايتقان سٶزدەرٸ ٷشٸن سوت الدىندا جاۋاپ بەرەتٸن بولادى. بۇدان باسقا امال قالمادى.
سۇحباتتاسقان نۇرلان ەۋبەكٸر
