كەزدەسۋگە اۋداندىق ءماسليحات دەپۋتاتتارى، اۋىلدىق وكرۋگ، پوسەلكە اكىمدەرى، دەربەس ءبولىم باسشىلارى، شارۋا قوجالىقتارىنىڭ ءتوراعالارى، قوعامدىق ۇيىمداردىڭ جەتەكشىلەرى، اۋدان تۇرعىندارى جانە ءبىلىم، دەنساۋلىق ساقتاۋ سالالارىنىڭ قىزمەتكەرلەرى، اۋداندىق بۇقارالىق اقپارات قۇرالدارىنىڭ وكىلدەرى قاتىسى.
جيىندى وتىرار اۋدانى اكىمى ەرلان ايتاحانوۆ اشىپ، جۇرگىزىپ وتىردى. كەزدەسۋدە ءسوز العان سەناتور اعىمداعى جىلدىڭ 5 قازان كۇنگى ەلباسىمىز نۇرسۇلتان نازاربايەۆتىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىنىڭ باستى باعىتتارىنا جەكە-جەكە توقتالىپ، ۇلت كوشباسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ ۇلتتىق كودىمىزعا، بولمىسىمىز بەن سانامىزدىڭ دامۋىنا ماڭىزى وتە زور ەكەندىگىن اڭگىمەگە ارقاۋ ەتتى. سەناتور ءوز سوزىندە:
– مەملەكەت باسشىسىنىڭ جىل سايىنعى جولداۋلارىن بىر-بىرىنەن ءبولىپ قاراۋعا بولمايدى. بارلىعىن دا ءبىر-بىرىن تولىقتىرىپ، بىر-بىرىمەن ۇندەسىپ جاتقان ماڭىزدى، ستراتەگيالىق قۇجات. بيىلعى جولداۋدىڭ ءمانى تەرەڭدە جاتىر. ويتكەنى پرەزيدەنتىمىز حالىقتىڭ كوكەيىندە جۇرگەن ماسەلەلەردى قوزعاپ، حالىق تابىسىنىڭ ءوسۋى، كاسىپكەرلىكتى دامىتۋ، تۇرمىس ساپاسىن ارتتىرۋ سەكىلدى مىندەتتەردى جۇكتەدى. ەل تۇرعىندارىنىڭ ءومىرى مەن ساپالى تۇرمىسىن جاقسارتۋدا، ەكونوميكاسى دامىعان، الەۋەتى جوعارى مەملەكەت قالىپتاستىرۋدا اتالعان مىندەتتەردىڭ ماڭىزى زور، – دەپ حالىق قالاۋلىسى جولداۋدىڭ نەگىزگى باسىم باعىتتارىن ەگجەي-تەگجەي تۇسىنىكتى ەتىپ باياندادى.
جيىن بارىسىندا جارىسسوزگە شىققان ش.قالداياقوۆ اتىنداعى مەكتەپ-گينازياسىنىڭ ءمۇعالىمى راۋشان مۇراتوۆا جولداۋدا ايتىلعان ۇستازداردىڭ قوعامداعى بەدەلىن كوتەرۋ تۋرالى ماسەلەلەردىڭ ۇستازدار قاۋىمىنا ۇلكەن قۋانىش سايلاعانىن جەتكىزسە، اۋداننىڭ بەلسەندى جاسى، وتىرار اۋداندىق تىلدەردى دامىتۋ جانە وقىتۋ ورتالىعىنىڭ ديرەكتورى باعلان جاپپاروۆ ەلباسىنىڭ ۇنەمى جاستارعا سەنىم ارتىپ، ءاردايىم قولداۋى ولارعا ۇلكەن جىگەر بەرەتىنىن تىلگە تيەك ەتتى.
سونداي-اق ءسوز بارىسىندا جەكە كاسىپكەر ءۇرلايىم بايتەمىروۆا جولداۋدا ايتىلعان جاڭالىقتاردى قۋانا قارسى العانىن ايتىپ، وسى قۇجاتتىڭ ارقاسىندا ەلىمىزدىڭ حالقىنىڭ ءال-اۋقاتى ءبىرشاما جاقسارىپ، كاسىپكەرلەرگە بولاشاققا نىق قادام باسۋعا تالپىنىس بەرەتىنىن ءسوز ەتىپ، اۋدان كاسىپكەرلەرىن وزدەرىنە بەرىلگەن ۇلكەن مۇمكىندىكتەردى پايدالانىپ، بەلسەندى جۇمىس جاساۋعا شاقىردى.
جيىنعا قاتىسۋشىلار پارلامەنت سەناتىنىڭ دەپۋتاتىنا كوكەيدەگى ساۋالدارىن قويىپ، تۇششىمدى جاۋاپتار الدى.
– بيىلعى جولداۋ ەلدىڭ الەۋمەتتىك-ەكونوميكالىق دامۋىنىڭ وزەكتى ماسەلەلەرىنە جانە قازاقستاندىقتاردىڭ تۇرمىستىق جاعدايىن ودان ءارى جاقسارتۋ مىندەتتەرىنە ارنالدى. تاريحي ماڭىزى زور قۇجاتتا ەلدىڭ بىرلىگىن نىعايتاتىن، الەۋەتىن ارتتىراتىن جۇمىستاردى جۇيەلى جولعا قويۋدىڭ قادامدارى، ءار سالانىڭ، كاسىبي ماماننىڭ جاۋاپكەرشىلىگىن شيراتا تۇسەتىن تەتىكتەر انىق كورسەتىلدى. اسىرەسە، «پەداگوگ مارتەبەسى تۋرالى» زاڭدى ازىرلەپ، قابىلدانۋى پەداگوگ ماماندىعىنىڭ بەدەلىن كوتەرۋ ماقساتىندا قابىلداناتىنى ءسوزسىز. سونداي-اق، ەلباسى كەلەسى جىلدى «جاستار جىلى» دەپ جاريالاۋعا ۇسىنۋىنىڭ ءوزى جاستاردىڭ بارلىق ساناتىن قولداۋ دەپ تۇسىنۋىمىزگە بولادى. ءومىر وزگەرۋدە، بۇل جاعدايدا دۇرىس قادام جاساپ، وڭ جاۋاپ قاتۋ ماڭىزدى. ال پرەزيدەنتتىڭ جاڭا باستاماسى قازاقستان حالقىنىڭ يگىلىگىنە جۇزەگە اسارى انىق. مەملەكەت باسشىسىنىڭ قازاقستان حالقىنا ارناعان جولداۋىن اۋدان حالقىنا كەڭىنەن ءتۇسىندىرىپ، جان-جاقتى اڭگىمەلەپ بەرگەنىڭىز ءۇشىن وتىرار اۋدانى تۇرعىندارىنىڭ اتىنان شىنايى العىسىمدى بىلدىرەمىن، – دەپ جيىندى قورىتىندىلادى.
