الماتى ونكولوگتارىنىڭ بىلىكتىلىگىنىڭ ارقاسىندا ءولىم-جىتىم سانى ازايعان. بۇل تۋرالى وڭىرلىك كوممۋنيكاسيا قىزمەتىندە الماتى ونكولوگيالىق ورتالىعىنىڭ باسشىسى نۇرسۇلتان ىزباعامبەتوۆ ايتتى.

سپيكەردىڭ ايتۋىنشا، ءولىم-جىتىم بويىنشا ءبىرىنشى كەزەكتە وكپە قاتەرلى ىسىگىنەن بولاتىن ءولىم-جىتىم – 14،9% (166 جاعداي)، 2 ورىندا كولورەكتالدى قاتەرلى ىسىگىنەن – 11،8% (131 جاعداي)، 3 ورىندا ءسۇت بەزى قاتەرلى ىسىگىنەن – 10،1% (112 جاعداي)، 4 ورىندا اسقازان قاتەرلى ىسىگىنەن – 10،0% (111 جاعداي) كورسەتكەن.

جىل باسىنان بەرى الماتىدا ءولىم-جىتىم ازايعان. وسى كەزەڭدە ونكولوگيالىق اۋرۋلاردان 1109 ناۋقاس قايتىس بولدى، بۇل وتكەن جىلدىڭ سايكەس كەزەڭىمەن سالىستىرعاندا 89 ادامعا از.

قازاقستاننىڭ باسقا وبلىستارى مەن قالالارىنان كەلۋشىلەردىڭ ەسەبىنەن الماتى قالاسىندا جىل سايىن قاتەرلى ىسىككە شالدىققاندار سانى ارتىپ وتىرعانىنا قاراماستان وسىنداي كورسەتكىش كورسەتىپ وتىرعانىن ەسكەرۋ كەرەك.

«بۇكىل الەمدە ونكولوگيالىق اۋرۋلار جۇرەك-قان تامىرلارى اۋرۋلارىمەن قاتار ءولىم-جىتىم دەڭگەيى جوعارى اۋرۋلار تىزىمىندە كوش باستاپ كەلەتىنىن ەستەرىڭىزگە سالا كەتەيىك. سوندىقتان سكرينينگتەن ءوتۋ وتە ماڭىزدى. ەرتە كەزەڭدە انىقتالعان كەز كەلگەن اۋرۋدان ەمدەلۋ مۇمكىندىگى جوعارى. قالا تۇرعىندارى وزدەرى تىركەلگەن جەردەگى ەمحانادا سكرينينگتەن وتە الادى.

سكرينينگ – تەگىن. تاعى ءبىر ايتا كەتەتىنى، قازان ايىندا ءسۇت بەزى وبىرىن ەرتە انىقتاۋ ايلىعى وتەتىنىن ەستەرىڭىزگە سالعىم كەلەدى.

وسى ايدىڭ ءار سەنبىسىندە ءبىزدىڭ ورتالىققا بارلىق قىز-كەلىنشەكتەر كەلىپ، كونسۋلتانتتاردىڭ تەكسەرۋىنەن وتە الادى. ءسىزدىڭ ءومىرىڭىز ەڭ الدىمەن ءوز قولىڭىزدا ەكەنىن ۇمىتپاڭىز»، – دەپ تۇيىندەدى ءسوزىن نۇرسۇلتان ىزباعامبەتوۆ.