كەزدەسۋ بارىسىندا مادەنيەت ىقشاماۋدانىنىڭ تۇرعىنى وسىعا قاتىستى ساۋال قويدى. مومىش ۇلى مەن بۇرىنداي كوشەلەرىنىڭ قيىلىسىندا ورنالاسقان بىرنەشە ءۇيدىڭ تۇرعىندارى اتىنان ءسوز سويلەگەن ول "الماتى-3" ۆوكزالىنىڭ قۇرىلىسىنا بايلانىستى باسپانالارى سۇرىلە مە دەپ الاڭدايتىنىن جەتكىزدى.
"نەگىزگى قۇجات - الماتى قالاسىنىڭ 2040 جىلعا دەيىنگى باس جوسپارى، ول وسى جىلدىڭ سوڭىنا دەيىن قابىلدانادى. مەنىڭ تۇسىنىگىمشە، ءسىز جەردى زاڭدى ساتىپ العانسىز. دەگەنمەن، قالا دامۋى كەرەك.
الايدا تۇرعىندار گازداندىرۋ مۇمكىندىگى جوق جانە تەحنولوگيالىق تالاپتارعا ساي كەلمەيتىن ۇيلەر تۇرعىزدى. مەن باس جوسپاردىڭ اياسىندا بۇل ماسەلەنى زاڭعا سايكەس بارىنشا ءتيىمدى قايتا قاراۋدى تاپسىردىم.
جوبا دايىن بولعان سوڭ، ونى سىزگە كورسەتىپ، بىرگە تالقىلاپ، شەشىم قابىلدايمىز. بۇل رەتتە قالانىڭ قارقىندى دامىپ كەلە جاتقانىن اتاپ وتەمىن. سوندىقتان ءبىز بارلىق ماسەلەلەردى نارىقتىق قۇنى بويىنشا وتەيمىز"، – دەدى دوسايەۆ.
سونىمەن قاتار اكىم قالا مەن قالا ماڭىنداعى كولىك بايلانىسىن جاقسارتۋ ءۇشىن قوسىمشا كولىك حابتارىنا دەيىن 30 مارشرۋت، "الماتى-2" ستانساسىنان قونايەۆ قالاسىنا دەيىن ەلەكتر پويىزى ىسكە قوسىلاتىنىن اتاپ ءوتتى.
"سونىمەن قاتار "الماتى-3" تەمىر جول ۆوكزالىنىڭ قۇرىلىسىن باستايمىز"،- دەدى ەربولات دوسايەۆ.
بۇعان قوسا ول 2025 جىلعا دەيىن قۇلجا تاسجولى مەن بورالداي-شامالعان تراسساسىن، 2030 جىلعا دەيىن تالعار تراكتىسى مەن جوعارعى قاسكەلەڭ جولى كەڭەيتىلەتىنىن ايتتى.
"قالا مەن الماتى وبلىسى اراسىندا كۇندەلىكتى قوعامدىق كولىكتە جول ءجۇرۋ 2025 جىلعا قاراي قازىرگى 400 مىڭنان 500 مىڭعا دەيىن جانە 2030 جىلعا قاراي 600 مىڭعا دەيىن وسەدى دەپ بولجانىپ وتىر. الماتى اگلومەراسياسىندا قوعامدىق كولىكتى دامىتۋ جونىندەگى بىرلەسكەن جوبالىق كەڭسە قۇرىلادى"،- دەدى الماتى اكىمى.
