Kezdesý barysynda Mádeniet yqshamaýdanynyń turǵyny osyǵa qatysty saýal qoidy. Momyshuly men Buryndai kósheleriniń qiylysynda ornalasqan birneshe úidiń turǵyndary atynan sóz sóilegen ol "Almaty-3" vokzalynyń qurylysyna bailanysty baspanalary súrile me dep alańdaitynyn jetkizdi.
"Negizgi qujat - Almaty qalasynyń 2040 jylǵa deiingi bas jospary, ol osy jyldyń sońyna deiin qabyldanady. Meniń túsinigimshe, siz jerdi zańdy satyp alǵansyz. Degenmen, qala damýy kerek.
Alaida turǵyndar gazdandyrý múmkindigi joq jáne tehnologiialyq talaptarǵa sai kelmeitin úiler turǵyzdy. Men bas jospardyń aiasynda bul máseleni zańǵa sáikes barynsha tiimdi qaita qaraýdy tapsyrdym.
Joba daiyn bolǵan soń, ony sizge kórsetip, birge talqylap, sheshim qabyldaimyz. Bul rette qalanyń qarqyndy damyp kele jatqanyn atap ótemin. Sondyqtan biz barlyq máselelerdi naryqtyq quny boiynsha óteimiz", – dedi Dosaev.
Sonymen qatar ákim qala men qala mańyndaǵy kólik bailanysyn jaqsartý úshin qosymsha kólik habtaryna deiin 30 marshrýt, "Almaty-2" stansasynan Qonaev qalasyna deiin elektr poiyzy iske qosylatynyn atap ótti.
"Sonymen qatar "Almaty-3" temir jol vokzalynyń qurylysyn bastaimyz",- dedi Erbolat Dosaev.
Buǵan qosa ol 2025 jylǵa deiin Qulja tasjoly men Boraldai-Shamalǵan trassasyn, 2030 jylǵa deiin Talǵar traktisi men joǵarǵy Qaskeleń joly keńeitiletinin aitty.
"Qala men Almaty oblysy arasynda kúndelikti qoǵamdyq kólikte jol júrý 2025 jylǵa qarai qazirgi 400 myńnan 500 myńǵa deiin jáne 2030 jylǵa qarai 600 myńǵa deiin ósedi dep boljanyp otyr. Almaty aglomeratsiiasynda qoǵamdyq kólikti damytý jónindegi birlesken jobalyq keńse qurylady",- dedi Almaty ákimi.
