الماتى قالاسىندا جالعا الىنعان پاتەردى ءتىنتۋ كەزىندە ءۇش شەتەلدىكتەن 5 مىڭنان استام SIM-كارتا تابىلدى، دەپ حابارلايدى Dalanews.kz.
"قما-نىڭ الماتى قالاسى بويىنشا دەپارتامەنتى ءۇش شەتەلدىك ازاماتتى ۇستادى. ولاردى جالعا الىنعان پاتەردە ءتىنتۋ بارىسىندا التى SIM-بوكس انىقتالىپ، تاركىلەندى. بۇل قۇرىلعىلار الاياقتىق سحەمالاردا جاپپاي قوڭىراۋ شالۋ، حابارلاما جىبەرۋ جانە ابونەنتتىك نومىرلەردى اۋىستىرۋ ءۇشىن پايدالانىلادى. سونىمەن قاتار، ءتۇرلى ءموبيلدى وپەراتورلاردىڭ 5 مىڭنان استام SIM-كارتاسى تاركىلەندى"، – دەلىنگەن قارجى مونيتورينگى اگەنتتىگى (قما) جاريالانعان حابارلامادا.
اتالعان تۇلعالارعا قاتىستى قىلمىستىق كودەكستىڭ 213-بابى 2-بولىگى (ۇيالى بايلانىس ابونەنتتىك قۇرىلعىسىنىڭ، ابونەنتتى سايكەستەندىرۋ قۇرىلعىسىنىڭ يدەنتيفيكاسيالىق كودىن زاڭسىز وزگەرتۋ، سونداي-اق يدەنتيفيكاسيالىق كودتى وزگەرتۋگە ارنالعان باعدارلامالاردى ازىرلەۋ، پايدالانۋ جانە تاراتۋ) بويىنشا سوتقا دەيىنگى تەرگەۋ تىركەلدى.
"كۇدىكتىلەر ەكى اي مەرزىمگە قاماۋعا الىندى. ولاردىڭ ينتەرنەت-الاياقتىققا قاتىسى تەكسەرىلۋدە"، – دەپ تولىقتىردى قما وكىلدەرى.
