Алматы қаласында жалға алынған пәтерді тінту кезінде үш шетелдіктен 5 мыңнан астам SIM-карта табылды, деп хабарлайды Dalanews.kz.

"ҚМА-ның Алматы қаласы бойынша департаменті үш шетелдік азаматты ұстады. Оларды жалға алынған пәтерде тінту барысында алты SIM-бокс анықталып, тәркіленді. Бұл құрылғылар алаяқтық схемаларда жаппай қоңырау шалу, хабарлама жіберу және абоненттік нөмірлерді ауыстыру үшін пайдаланылады. Сонымен қатар, түрлі мобильді операторлардың 5 мыңнан астам SIM-картасы тәркіленді", – делінген Қаржы мониторингі агенттігі (ҚМА) жарияланған хабарламада.

Аталған тұлғаларға қатысты Қылмыстық кодекстің 213-бабы 2-бөлігі (ұялы байланыс абоненттік құрылғысының, абонентті сәйкестендіру құрылғысының идентификациялық кодын заңсыз өзгерту, сондай-ақ идентификациялық кодты өзгертуге арналған бағдарламаларды әзірлеу, пайдалану және тарату) бойынша сотқа дейінгі тергеу тіркелді.

"Күдіктілер екі ай мерзімге қамауға алынды. Олардың интернет-алаяқтыққа қатысы тексерілуде", – деп толықтырды ҚМА өкілдері.