الماتىداعى اباي الاڭىندا «اڭىز دومبىرا» اتاۋىمەن ۇلتتىق دومبىرا كۇنى اتالىپ ءوتتى. مەگاپوليس تۇرعىندارى مەن قالا قوناقتارى ءۇشىن ساحنادا حالىق مۋزىكالىق اسپابىنا ارنالعان اندەر، سونداي-اق تانىمال دومبىراشىلاردىڭ ورىنداۋىنداعى ايگىلى كۇيلەر شىرقالدى، – دەپ حابارلايدى Dalanews.kz.
تىڭدارمان قاۋىم «سازگەن سازى» فولكلورلىق-ەتنوگرافيالىق ءانسامبلى مەن اسىلبەك ەنسەپوۆتىڭ ورىنداۋىنداعى ايگىلى كومپوزيسيالاردى، «قوڭىر» توبى مەن ارداق بالاجانوۆانىڭ، نۇرجان جانپەيىسوۆ جانە تاعى باسقا ونەر مايتالماندارىنىڭ ورىنداۋىنداعى حالىق اندەرىن تىڭدادى.
حالىق مۋزىكاسىنىڭ تىڭدارماندارى سەكەن تۇرىسبەكوۆتىڭ اۆتورلىق ورىنداۋىنداعى اندەرىن، سونداي-اق ەربولات مۇستافايەۆ پەن نۇركەن ءاشىروۆ كۆارتەتىنىڭ وقۋشىلارىمەن بىرگە كورسەتكەن ونەرىن تىڭدادى. كەنەن ازىربايەۆتىڭ اڭىزعا اينالعان «باستاۋ» كۇيىن شولپان دارجانوۆا ورىنداسا، جيەنباي جىراۋدىڭ اتتاس تۋىندىسىن ۇلجان بايبوسىنوۆا، ال «سۇگىردىڭ تەرمەسى» كومپوزيسياسىن ايگۇل ەلشىبايەۆا ورىندادى. «سالتانات» بي ءانسامبلىنىڭ قايتالانباس ونەرى مۋزىكالىق كەشتىڭ كوركىن قىزدىرا ءتۇستى.
مەرەكەلىك كەشتە ايگۇل قوسانوۆا مەن ءمولدىر اۋەلبەكوۆا دا ونەر كورسەتتى. «مارالدىم»، «الماتىم جۇرەگىمدە»، «سۇگىردىڭ تەرمەسى»، «تۇركىنىڭ تامشى جاڭعىرىعى» سياقتى كومپوزيسيالار كەشكە جينالعان تىڭدارمان قاۋىمنىڭ جۇرەگىن باۋراپ الدى. كەشتى قازاق ونەرىنىڭ مايتالمانى روزا رىمبايەۆا «دومبىرا تۋرالى باللادا» انىمەن ءتامامدادى.
