الماتىدا 2025 جىلى ۇزىندىعى 5،7 شاقىرىم، اۋماعى 23،4 گەكتار بولاتىن ۇلكەن الماتى وزەنىنىڭ جاعالاۋىن كورىكتەندىرۋ جۇمىستارى باستالادى، – دەپ حابارلايدى Dalanews.kz الماتى قلاسى ءماسليحاتىنىڭ باسپا ءسوز قىزمەتىنە سىلتەمە جاساپ.
2025–2027 جىلدارعا ارنالعان ءتيىستى بيۋدجەت جوباسى الداعى ءماسليحات سەسسياسىندا قارالادى. جوباعا بەتوندى تىرەك قۇرىلىمدارىن جاڭارتۋ، جاياۋ جۇرگىنشىلەر مەن ۆەلوسيپەد جولدارىن سالۋ، كوپىرلەر ورناتۋ، جارىقتاندىرۋ تىرەكتەرىن، بەينەباقىلاۋ كامەرالارىن، بالالار مەن سپورت الاڭدارىن، دەمالىس ايماقتارىن جانە مودۋلدىك قوعامدىق دارەتحانالاردى ورنالاستىرۋ كىرەدى. سونىمەن قاتار، اۋماقتى كوگالداندىرۋ جانە قاراۋ الاڭدارىن جاساۋ كوزدەلگەن.
ايتا كەتسەك، 2024 جىلى الماتىنىڭ الاتاۋ اۋدانىندا بورالداي وزەنى بويىنداعى 24 گەكتار اۋماقتى قامتيتىن جاسىل ايماقتى كورىكتەندىرۋ اياقتالعان بولاتىن. بۇل جەردە جاياۋ جۇرگىنشىلەرگە ارنالعان كوپىر، سكەيتپارك، بالالار مەن سپورت الاڭدارى، ورىندىقتار، قوقىس جاشىكتەرى جانە مودۋلدىك دارەتحانالار ورناتىلدى. مۇنداي جوبالاردىڭ تاجىريبەسى كورسەتكەندەي، كورىكتەندىرىلگەن جاعالاۋلار مەن جاسىل ايماقتار تۇرعىنداردىڭ سۇيىكتى دەمالىس ورنىنا اينالىپ، قالالىق ورتانىڭ ساپاسىن ارتتىرادى.
