– ءبىز ءوزىمىزدىڭ قۇرىلعالارمەن قاتار مايلى جىلىتقىشپەن باسەكەلەس برەندتىڭ قۇرىلعىلارىن تەكسەرۋ ءۇشىن تەستتەر جۇرگىزدىك. ءۇش بىردەي 10 شارشى مەتر بولمە بولمەدە ءۇش ءتۇرلى قۇرىلعىنى قويدىق، كەيدە ەسىكتەر مەن تەرەزەلەر اشىلدى. باستاپقىدا بولمەدەگى تەمپەراتۋرا 17 گرادۋس بولدى، 10 ساعات جۇمىس ىستەگەننەن كەيىن ءبىزدىڭ جىلىتقىش بولمەنى 26 گرادۋسقا، مايلى جىلىتقىش 27-گە، باسەكەلەس كومپانيانىڭ قۇرىلعىسى – 24-كە دەيىن قىزدىردى. ءبىراق مايلى جىلىتقىش ساعاتىنا 2 كيلوۆاتت ەنەرگيا جۇمسادى، ال ءبىزدىڭ 600 ۆاتت، ياعني جىلىتقىشتار شامامەن 3،5 ەسە ۇنەمدى. سونىمەن قاتار، باتىس ەلدەرىنىڭ تۇرعىندارى اسا قاتتى باعالايتىن ادەمى، ەستەتيكالىق ديزاينمەن جاسالعان، – دەيدى Premium Heater ءجشس-نىڭ كوممەرسيالىق ديرەكتورى ساۋران احمەتجانوۆ.
ساۋران احمەتجانوۆ مۇنىڭ بارلىعى قاراپايىم قىزىعۋشىلىقتان باستالعانىن ايتادى. كومپانيانىڭ نەگىزىن قالاۋشىلاردىڭ ءبىرى، وسى جۇيەنى ويلاپ تاپقان حيميك عالىم ەكسپەريمەنتتەر جۇرگىزۋدى، قوسپالاردىڭ قاسيەتتەرىن زەرتتەۋدى ۇناتاتىن.
كەزدەيسوق جاعدايدا زەرتتەۋ بارىسىندا ول وتە ۇلكەن جىلۋ بەرە الاتىن قوسپانى الدى. وسىلايشا، سىناق ءوندىرىسىن قۇرۋ يدەياسى پايدا بولدى، قۇرىلتايشىلار ونى 2019 جىلى ۆارشاۆادا اشتى.
– مەن سول كەزدە پولشادا وقىدىم. بۇل تاقىرىپ وتە وزەكتى، ويتكەنى ەۋروپادا، اسىرەسە باتىستا، ورتالىق جىلىتۋ جۇيەسىنە قوسىلۋ قىمبات ءارى جارىق تا ارزان ەمەس. ولاردىڭ ۇيلەرىنە قىستا مۇلدە جىلۋ بەرىلمەيدى، تۇرعىنداردىڭ كوپشىلىگى ۇيدە كۇرتەشەمەن جۇرەدى، – دەدى ساۋران احمەتجانوۆ. ول عالىمعا سايتتى دايىنداۋعا كومەكتەسكەن، الەۋمەتتىك جەلىلەردە جارناما بەرىپ، قۇرىلعىنى بەلسەندى تۇردە ساتا باستاعان.
قازاقستاندىق ستارتاپتىڭ ينفراقىزىل جىلىتۋ قۇرىلعىلارىنىڭ سىناق پارتياسى وتە تەز ۋاقىتتا ساتىلدى، العاشقى كۇندەرى 200 داناسى ءوتتى. سودان كەيىن قۇرىلعىنىڭ كەم-كەتىگى تۇگەندەلدى، تاپسىرىس بەرۋشىلەردىڭ قالاۋى بويىنشا جاڭادان كەلگەن كاسىپكەرلەر ديزايندى وزگەرتتى، باعاعا اسەر ەتەتىن قوسىمشا فۋنكسيالاردى الىپ تاستادى. كوروناۆيرۋس پاندەمياسى ورشىگەن تۇستا ساتىلىم دا ءوستى.
سودان كەيىن كاسىبىن جاڭا باستاعان وندىرۋشىلەر قازاقستانعا ورالىپ، الماتىنىڭ اتپ اەا اۋماعىندا ءوز ءوندىرىسىن دامىتۋعا شەشىم قابىلدادى. سەبەبى بۇل جاقتا جالداۋدىڭ تومەن مولشەرلەمەسى، سالىق جەڭىلدىكتەرى جانە قاجەتتى ينفراقۇرىلىممەن قامتاماسىز ەتەتىنى ۇنادى. سونداي-اق، وتكەن جىلى پاندەميا كەزىندە ولار جالداۋ اقىسىن تولەۋدەن بوساتىلدى، بۇل جاس كومپانيا ءۇشىن ۇلكەن قولداۋ بولعانىن ايتا كەتەيىك.
بۇگىنگى تاڭدا made in KZ دەپ جازىلاتىن تاۋار پارتياسى پولشاعا جىبەرىلەدى. بۇل تاۋارلارعا نورۆەگيا مەن ۇلىبريتانيادان كەلگەن ديستريبيۋتورلار دا قازاقستاندىق ونىمگە ۇلكەن قىزىعۋشىلىق تانىتۋدا، ءتىپتى مەموراندۋمعا قول قويىلدى. كيپر مەن وزبەكستان تاپسىرىس بەرگەن. ءقازىر ءۇندىستاندا قازاقستاندىق تەحنولوگيا بويىنشا فرانشيزانى ىسكە قوسۋ مۇمكىندىگى تالقىلانىپ جاتىر.
– ۇلىبريتانيادا ەلەكتر جىلىتۋ قۇرىلعىلارى نارىعىنىڭ 70-80%-ى وتباسىلىق كومپانيالاردىڭ ەسەبىنەن ۇستالادى، ياعني، وندا مونوپوليست، ءىرى برەندتەر جوق. ءبىز ولارمەن وسى نارىقتىڭ ءبىر بولىگى ءۇشىن كۇرەسە الامىز دەپ ويلايمىز. ازىرگە بۇل ويىمىز ىسكە اسىپ جاتىر، – دەيدى ساۋران احمەتجانوۆ.
ەۋروپالىق تۇتىنۋشى ءۇشىن قازاقستاندىق جىلىتۋ قۇرىلعىسىنىڭ قۇنى 80 ەۋرونى قۇرايدى، بۇل شەتەلدىك انالوگتاردان الدەقايدا ارزان.
ايتپاقشى، كومپانيانىڭ تاۋار بەلگىسى ۇلىبريتانيادا تىركەلگەن. كومپانيادا جوعارى ۆولتتى جابدىقتاردىڭ قاۋىپسىزدىگى تۋرالى ەۋروپالىق سەرتيفيكاتتىڭ بولۋى دا ماڭىزدى ءرول اتقارادى. بۇگىنگى تاڭدا شتاتتا بارلىعى 4 مامان جۇمىس ىستەيدى. الايدا كاسىپكەرلەر تاعى دا جابدىقتار ساتىپ الماق. ينفراقىزىل جىلىتۋ قۇرىلعالارىنىڭ الەمدىك نارىعى ءالى دە بوس بولعاندىقتان، كاسىپكەرلەر قىزمەتكەر سانىن كوبەيتۋدى جانە ءوندىرىس كولەمىن ۇلعايتۋدى جوسپارلاپ وتىر.
