الماتى قالاسىنداعى سايران كولىنە ءجاسوسپىرىم مەن ەرەسەك ەر ادام باتىپ كەتتى. قايعىلى وقيعا 25 ماۋسىمدا بولدى،- دەپ حابارلايدى Dalanews.kz
قايعىلى وقيعا تۋرالى العاشقى اقپارات 109 شۇعىل قىزمەتىنە تۇسكەن. دەپارتامەنتتىڭ حابارلاۋىنشا، 2007 جىلى تۋعان ءجاسوسپىرىم سۋعا باتىپ كەتكەن. وقيعا ورنىنا دەرەۋ جەتكەن سۇڭگۋىرلەر بالانىڭ دەنەسىن سۋدان الىپ شىقتى. مارقۇممەن بىرگە بولعان ەكىنشى ءجاسوسپىرىم جاعاعا ءوز كۇشىمەن ءجۇزىپ شىققان.
كەشكى ۋاقىتتا تاعى ءبىر ادامنىڭ سۋعا كەتكەنى بەلگىلى بولدى. 1977 جىلى تۋعان ەر ادام ماس كۇيدە رۇقسات ەتىلمەگەن اۋماقتا شومىلىپ ءجۇرىپ، اجال قۇشتى.
الماتى قالالىق توتەنشە جاعدايلار دەپارتامەنتى سايران كولىندە شومىلۋعا ءالى قاتاڭ تىيىم سالىنعانىن ەسكەرتتى. ويتكەنى كول ماڭىنداعى قۇرىلىس جانە سانيتارلىق جۇمىستار تولىق اياقتالعان جوق، سۋ ايدىنى ءالى رەسمي تۇردە پايدالانۋعا بەرىلمەگەن.
"تىيىم سالۋ ءتارتىبى بۇزىلعان جاعدايدا، قولدانىستاعى زاڭناماعا سايكەس اكىمشىلىك شارالار، ونىڭ ىشىندە ايىپپۇلدار قولدانىلادى. قالا تۇرعىندارى مەن قوناقتارىن سۋداعى قاۋىپسىزدىك ەرەجەلەرىن ساقتاۋعا جانە رۇقسات ەتىلمەگەن جەرلەردە شومىلۋدان باس تارتۋعا شاقىرامىز"، – دەلىنگەن قالالىق تجد باسپا ءسوز حابارلاماسىندا.
