الماتى قالاسى تۇركسىب اۋدانىنىڭ پوليسەيلەرى قالا اۋماعىنداعى ءتۇرلى نىساندارعا تىيىم سالىنعان زاتتارعا قاتىستى جارناما جازبالارىن جازعان 26 جاستاعى ەر ادامدى ۇستادى. ول تۇرعىن ۇيلەردىڭ قابىرعالارىنا، قورشاۋلارعا جانە باسقا دا كورىنەتىن جەرلەرگە «ەسىرتكى جارنامالارىن» سالعان،- دەپ حابارلايدى Dalanews.kz
پوليسيا قىزمەتكەرلەرىنىڭ مالىمەتىنشە، 1998 جىلى تۋعان ازامات بۇل ارەكەتتەردى ينتەرنەت ارقىلى «تاپسىرىسپەن» جاساعان جانە الدىن الا دەرەكتەرگە سايكەس، ءار جازبا ءۇشىن اقى الىپ وتىرعان. ونى جەرگىلىكتى پوليسيا قىزمەتكەرلەرى ۆانداليزم ارەكەتىن ىسكە اسىرىپ جاتقان كەزدە ۇستادى.
«ۇستالعان ازاماتتان بوياۋى بار باللوندار، ترافارەتتەر مەن زاڭسىز ارەكەتىن راستايتىن حات الماسۋلارى بار ۇيالى تەلەفون تاركىلەندى. اتالعان دەرەككە سايكەس ق ر قك-نىڭ 299-1-بابى بويىنشا قىلمىستىق ءىس قوزعالدى. بۇل باپ ناقتى باس بوستاندىعىنان ايىرۋ جازاسىن قاراستىرادى. ءىس ماتەريالدارى سوتقا جولداناتىن بولادى»، – دەدى، تۇركسىب اۋداندىق پب-نا قاراستى پوليسيا ءبولىمىنىڭ باستىعى داۋلەت سەيتقۇلوۆ.
بايانداماشى مۇنداي ارەكەتتەردىڭ «قىزىعۋشىلىق» نە بولماسا كوشە گراففيتيگە جاتپايتىنىن ەرەكشە اتاپ ءوتتى.
«ەسىرتكى جارنامالارىن جازۋ قىلمىستىق جاۋاپكەرشىلىككە اكەلەتىنىن ءار ازامات ءتۇسىنۋى كەرەك. بۇل جاي عانا قابىرعاداعى سۋرەت ەمەس، بۇل – تىيىم سالىنعان زاتتاردىڭ تارالۋىنا كومەكتەسۋ، ياعني زاڭ الدىندا جاۋاپ بەرۋگە تۋرا كەلەدى. ءبىز مۇنداي قۇقىقبۇزۋشىلىقتاردى انىقتاۋ بويىنشا جۇيەلى جۇمىس جۇرگىزىپ جاتىرمىز جانە تۇرعىنداردى ساق بولۋعا شاقىرامىز: ەگەر ءسىز وسىنداي دەرەكتەردىڭ كۋاسى بولساڭىز، دەرەۋ پوليسياعا حابار بەرىڭىز. قالامىزدى ەسىرتكى قاۋىپىنەن تەك بىرلەسكەن كۇشپەن عانا قورعاي الامىز»، – دەدى داۋلەت سەيتقۇلوۆ.
