Almaty qalasy Túrksib aýdanynyń politseileri qala aýmaǵyndaǵy túrli nysandarǵa tyiym salynǵan zattarǵa qatysty jarnama jazbalaryn jazǵan 26 jastaǵy er adamdy ustady. Ol turǵyn úilerdiń qabyrǵalaryna, qorshaýlarǵa jáne basqa da kórinetin jerlerge «esirtki jarnamalaryn» salǵan,- dep habarlaidy Dalanews.kz
Politsiia qyzmetkerleriniń málimetinshe, 1998 jyly týǵan azamat bul áreketterdi internet arqyly «tapsyryspen» jasaǵan jáne aldyn ala derekterge sáikes, ár jazba úshin aqy alyp otyrǵan. Ony jergilikti politsiia qyzmetkerleri vandalizm áreketin iske asyryp jatqan kezde ustady.
«Ustalǵan azamattan boiaýy bar ballondar, trafaretter men zańsyz áreketin rastaityn hat almasýlary bar uialy telefon tárkilendi. Atalǵan derekke sáikes QR QK-niń 299-1-baby boiynsha qylmystyq is qozǵaldy. Bul bap naqty bas bostandyǵynan aiyrý jazasyn qarastyrady. Is materialdary sotqa joldanatyn bolady», – dedi, Túrksib aýdandyq PB-na qarasty politsiia bóliminiń bastyǵy Dáýlet Seitqulov.
Baiandamashy mundai áreketterdiń «qyzyǵýshylyq» ne bolmasa kóshe graffitige jatpaitynyn erekshe atap ótti.
«Esirtki jarnamalaryn jazý qylmystyq jaýapkershilikke ákeletinin ár azamat túsinýi kerek. Bul jai ǵana qabyrǵadaǵy sýret emes, bul – tyiym salynǵan zattardyń taralýyna kómektesý, iaǵni Zań aldynda jaýap berýge týra keledi. Biz mundai quqyqbuzýshylyqtardy anyqtaý boiynsha júieli jumys júrgizip jatyrmyz jáne turǵyndardy saq bolýǵa shaqyramyz: eger siz osyndai derekterdiń kýási bolsańyz, dereý politsiiaǵa habar berińiz. Qalamyzdy esirtki qaýipinen tek birlesken kúshpen ǵana qorǵai alamyz», – dedi Dáýlet Seitqulov.
