«مەرەيلى وتباسى» بايقاۋى وتباسى، ادامگەرشىلىك، رۋحانيات ينستيتۋتتارىن نىعايتۋ، ەرلى-زايىپتىلار جاۋاپكەرشىلىگىنىڭ ماڭىزىن ءتۇسىنۋ جانە اتا-انالاردىڭ بالا تاربيەلەۋدەگى جاۋاپكەرشىلىگىن ارتتىرۋ، وتباسىلىق قۇندىلىقتاردى كورسەتۋ جانە كەڭىنەن ناسيحاتتاۋ، كامەلەت جاسىنا تولعان بالالاردىڭ ەڭبەككە جارامسىز جانە قارت اتا-انالارىنا قامقورلىق تانىتۋلارى ماقساتىندا وتكىزىلەدى.
«مەرەيلى وتباسى» ۇلتتىق بايقاۋىن ۇر تۇڭعىش پرەزيدەنتى – ەلباسى نۇرسۇلتان نازاربايەۆ 2013 جىلى بەكىتكەن بولاتىن. بايقاۋ داستۇرگە اينالدى: مەملەكەتىمىزدىڭ دامۋىنا ۇلەس قوسقان وتباسىلار انىقتالۋدا، ال بۇل رۋحانيات پەن سالاۋاتتى قوعامدى قولداۋ ءۇشىن وتە ماڭىزدى. بايقاۋ بالالاردىڭ تالانتىن اشۋدىڭ، كوڭىل-كۇيدىڭ، قۇندىلىقتارىنىڭ قاينار كوزى وتباسى ەكەنىن كورسەتۋدە. ءبىزدىڭ قالانىڭ جەڭىمپازدارى – بۇل كوپتەگەن الماتىلىقتار مەن قازاقستاندىقتاردىڭ كوپتەگەن ۇرپاقتارىنا ۇلگى بولاتىن وتباسىلار»، - دەدى الماتى قالاسى اكىمىنىڭ ورىنباسارى ەرجان باباقۇماروۆ، جەڭىمپازداردى قۇتتىقتاپ، ولارعا زور دەنساۋلىق پەن باق-بەرەكە تىلەدى.
بايقاۋدىڭ قالالىق كەزەڭىنە قاتىسۋعا 142 وتباسى ءوتىنىش بەردى. ناۋرىزباي اۋدانىنىڭ احمەتوۆتار وتباسى جەڭىمپاز اتاندى. احمەتوۆتار وتباسىنىڭ جۇبى – ەكەۋى دە دارىگەر، كىشى قىزى مەن نەمەرەلەرى اتا-انالارىنىڭ جولىن قۋعان.
– بىزگە ەرەكشە كوڭىل بولگەندەرىڭىزگە وتە ريزامىز، بۇرىن مۇندايدى كورگەن ەمەسپىز. ءبىزدىڭ وتباسىمىزعا نازار اۋدارىلىپ، كەرەمەت سىيلىق جاسالدى. ءبىز وتباسىمىزدىڭ باسقالارعا ۇلگى بولعانىنا جانە وتانىمىزدىڭ دامۋىنا ۇلەس قوسقانىمىزعا وتە قۋانىشتىمىز. مەنىڭ جاسىم 85-تە، جولداسىم 90-دا. بيىل ۇيلەنگەنىمىزدىڭ تەمىر تويىن – نەكەدە بولعانىمىزدىڭ 65 جىلدىعىن اتاپ وتەمىز. بارلىق نەمەرەلەرىمدى ءوز بالالارىمداي تاربيەلەدىم، بۇگىندە ولار تابىستى تۇلعالار. ءبىزدىڭ وتباسىمىزعا ابىروي مەن قۇرمەت كورسەتىلگەنىنە قۋانىشتىمىز، – دەدى كۇنسارى احمەتوۆا.
بايقاۋدى وتكىزۋ جونىندەگى قالالىق كوميسسيانىڭ قۇرامىنا قالا اكىمىنىڭ ايەلدەر جانە وتباسىلىق-دەموگرافيالىق ساياسات جونىندەگى ينسپەكتورى، قالالىق باسقارمالار باسشىلارى، ۇەۇ وكىلدەرى، الماتى قالاسى قوعامدىق كەڭەسىنىڭ مۇشەلەرى، قوعام قايراتكەرلەرى جانە ت.ب. ەندى.
الماتىدا اۋداندىق دەڭگەيدە جەڭىسكە جەتكەن وتباسىلار دا ماراپاتتالدى:
- الاتاۋ اۋدانى – ىزتىلەۋوۆتەر وتباسى، ءوزىنىڭ ءومىر جولىن ءبىلىم بەرۋ سالاسىنا ارناعان، جاستاردىڭ كوپتەگەن بۋىندارىن تاربيەلەگەن. ولار وقۋشىلاردىڭ ءبىلىمىن ارتتىرۋ ماقساتىندا «Zerde Education» وقۋ ورتالىعىن قۇردى؛
- المالى اۋدانى – سىدىقوۆتار وتباسى، ولار ءبىلىم، ونەر جانە قاۋىپسىزدىك سالاسىندا جۇمىس ىستەيدى؛
- اۋەزوۆ اۋدانى – ءبىلالوۆتار وتباسى، ولاردىڭ بارلىق مۇشەلەرى ءبىلىم بەرۋ سالاسىندا جۇمىس ىستەيدى؛
- بوستاندىق اۋدانى – بەستەمبايەۆتار وتباسى مەديسينا سالاسىنا ايتارلىقتاي ۇلەس قوستى؛
- جەتىسۋ اۋدانى – شومانبايەۆتار وتباسى ەكونوميكا مەن كاسىپكەرلىك سالاسىنا ۇلەس قوسۋدا. وتاعاسى كاسىپكەرلىكتى قايىرىمدىلىقپەن ۇشتاستىرۋدا؛
- مەدەۋ اۋدانى – كوپبالالى دارىبايەۆتار وتباسى وقۋدا جانە سپورتتا جەتىستىككە جەتكەن التى بالانى تاربيەلەۋدە؛
- تۇركسىب اۋدانى – كوپبالالى ءابىلعازى وتباسى، وتباسى مۇشەلەرى ءوز ومىرلەرىن ولەڭگە، ادەبيەتكە، مۋزىكاعا ارناعان ونەر وكىلدەرى. جەتى ۇرپاقتان تۇراتىن ءابىلعازى وتباسىنىڭ شىعارماشىلىق تاجىريبەسى ءجۇز جىلدان اسادى.
ايتا كەتەرلىگى، شارا ادامداردى كوپ جيناماي، ەپيدەميولوگيالىق نورمالاردى قاتاڭ ساقتاي وتىرىپ ءوتتى. ماراپاتتاۋعا كەلگەن قاتىسۋشىلار ۆاكسينالانعاندار قاتارىندا.
