مەرەيلى وتباسى اتانىپ، رەسپۋبليكالىق كەزەڭگە جولداما العان - سىبانبەكوۆتەر وتباسى. بولات قۋانىشبەك ۇلى مەن سانا شايحان قىزى – كوپبالالى اتا-انا. ولار وتباسىلىق كاسىپپەن اينالىسادى. قايىرىمدى اۋلەت كوپ جىلدان بەرى جاعدايى تومەن جانۇيالارعا كومەك قولىن سوزادى. «مەكتەپكە جول» اكسياسى اياسىندا جىلدا 300-دەن استام بالانى مەكتەپ فورماسى، وقۋعا قاجەت قۇرالدارمەن قامتاماسىز ەتەدى. مەرەيلى وتباسىندا «قايىرىمدىلىق جۇرەكتى نۇرلاندىرادى، ومىرگە ءمان دارىتادى» دەگەن جازىلماعان قاعيدا ساقتالعان.
– ءوز باسىم مۇنداي كونكۋرسقا ءبىرىنشى رەت كەلىپ وتىرمىن. ال سىبانبەكوۆتەر وتباسى بىرنەشە كونكۋرسقا قاتىسىپ، جەڭىمپاز اتانعان. بۇل جولعى سايىس تا جاقسى ءوتتى، – دەدى قالا تۇرعىنى زايرا بوشانوۆا.
ۇلتتىق بايقاۋعا قاتىسۋعا وتىنىمدەر مامىر-شىلدە ايلارىندا قابىلدانعان. بيىل 232 وتباسى كونكۋرسقا قاتىسۋعا نيەت بىلدىرگەن. الدىمەن اۋداندىق كوميسسيانىڭ قاراۋىنان ءوتىپ، قالالىق كەزەڭگە 16 اۋلەت جولداما العان. سىبانبەكوۆتەر وتباسىنان بولەك، اۋدانارالىق كەزەڭدە مەرەيى ۇستەم بولعان وتباسىلار دا ماراپاتتالدى.
– رەسپۋبليكالىق كونكۋرسقا قاتىسقان كەزدە ءوزىن كورسەتە الاتىن، جەتكەن جەتىستىكتەرى مول، ۇرپاعىنا تاماشا تالىم-تاربيە بەرگەن، ولاردىڭ ومىردە ءوز ورنىن تابۋعا ىقپال ەتكەن جانە سونىڭ يگىلىگىن ەلى دە، اتا-انانىڭ ءوزى دە كورىپ وتىرعان جانۇيانىڭ وزىپ شىعۋى ءبارىمىزدى قۋانتۋى كەرەك، – دەدى قازاقستاننىڭ ەڭبەك ەرى اياگۇل ميرازوۆا.
كوميسسيا قۇرامىندا قالا اكىمى مەن ورىنباسارى، بىرنەشە باسقارما باسشىسى، سونداي-اق ۇكىمەتتىك ەمەس ۇيىمداردىڭ وكىلدەرى، ءماسليحات دەپۋتاتتارى جانە قالانىڭ قۇرمەتتى ازاماتتارى بولدى.
– قالالىق كوميسسيا جەڭىمپازداردى انىقتاۋدا مىناداي كريتەرييلەرگە باسا نازار اۋداردى. ولار وتباسىنىڭ جەتىستىگى، وتباسىنىڭ بوس ۋاقىتتا نەمەن اينالىساتىنى، قوعامدىق جۇمىسقا ارالاسۋى، جادىگەرلەرى، وتباسى قىزىعۋشىلىعى، – دەدى قوعامدىق دامۋ باسقارماسىنىڭ باس مامانى اقبوتا سادىق.
قوعام نازارىن وتباسىلىق قۇندىلىقتاردى ساقتاۋعا اۋدارىپ، ونى دارىپتەۋ ماقساتىندا ەلىمىزدە ءار جىل سايىن «مەرەيلى وتباسى» ۇلتتىق بايقاۋىن وتكىزۋ داستۇرگە اينالعان. بيىل رەسپۋبليكا كولەمىندەگى كونكۋرستىڭ باستاۋ العانىنا 10 جىل بولدى.
