Mereıli otbasy atanyp, respýblıkalyq kezeńge joldama alǵan - Sybanbekovter otbasy. Bolat Qýanyshbekuly men Sana Shaıhanqyzy – kópbalaly ata-ana. Olar otbasylyq kásippen aınalysady. Qaıyrymdy áýlet kóp jyldan beri jaǵdaıy tómen januıalarǵa kómek qolyn sozady. «Mektepke jol» aksıasy aıasynda jylda 300-den astam balany mektep formasy, oqýǵa qajet quraldarmen qamtamasyz etedi. Mereıli otbasynda «qaıyrymdylyq júrekti nurlandyrady, ómirge mán darytady» degen jazylmaǵan qaǵıda saqtalǵan.
– Óz basym mundaı konkýrsqa birinshi ret kelip otyrmyn. Al Sybanbekovter otbasy birneshe konkýrsqa qatysyp, jeńimpaz atanǵan. Bul jolǵy saıys ta jaqsy ótti, – dedi qala turǵyny Zaıra Boshanova.
Ulttyq baıqaýǵa qatysýǵa ótinimder mamyr-shilde aılarynda qabyldanǵan. Bıyl 232 otbasy konkýrsqa qatysýǵa nıet bildirgen. Aldymen aýdandyq komısıanyń qaraýynan ótip, qalalyq kezeńge 16 áýlet joldama alǵan. Sybanbekovter otbasynan bólek, aýdanaralyq kezeńde mereıi ústem bolǵan otbasylar da marapattaldy.
– Respýblıkalyq konkýrsqa qatysqan kezde ózin kórsete alatyn, jetken jetistikteri mol, urpaǵyna tamasha tálim-tárbıe bergen, olardyń ómirde óz ornyn tabýǵa yqpal etken jáne sonyń ıgiligin eli de, ata-ananyń ózi de kórip otyrǵan januıanyń ozyp shyǵýy bárimizdi qýantýy kerek, – dedi Qazaqstannyń Eńbek eri Aıagúl Mırazova.
Komısıa quramynda qala ákimi men orynbasary, birneshe basqarma basshysy, sondaı-aq úkimettik emes uıymdardyń ókilderi, máslıhat depýtattary jáne qalanyń qurmetti azamattary boldy.
– Qalalyq komısıa jeńimpazdardy anyqtaýda mynadaı krıterıılerge basa nazar aýdardy. Olar otbasynyń jetistigi, otbasynyń bos ýaqytta nemen aınalysatyny, qoǵamdyq jumysqa aralasýy, jádigerleri, otbasy qyzyǵýshylyǵy, – dedi Qoǵamdyq damý basqarmasynyń bas mamany Aqbota Sadyq.
Qoǵam nazaryn otbasylyq qundylyqtardy saqtaýǵa aýdaryp, ony dáripteý maqsatynda elimizde ár jyl saıyn «Mereıli otbasy» ulttyq baıqaýyn ótkizý dástúrge aınalǵan. Bıyl Respýblıka kólemindegi konkýrstyń bastaý alǵanyna 10 jyl boldy.
