الماتىدا كونترافاكت ويىنشىقتار ساتىلىمى اشكەرەلەندى

اقتوتى جاپاتوۆا 06 تام. 2025 15:15

الماتىدا كونترافاكت ويىنشىقتاردىڭ اينالىمى توقتاتىلدى،- دەپ حابارلايدى Dalanews.kz

"كونترافاكت" جەدەل-الدىن الۋ ءىس-شاراسى اياسىندا الماتى قالاسى پد كيبەرقىلمىسقا قارسى كۇرەس باسقارماسى جانە ادىلەت دەپارتامەنتىنىڭ قىزمەتكەرلەرى قالاداعى ساۋدا ورىندارى مەن قويمالارعا رەيد جۇرگىزدى.

تەكسەرۋگە ءبىر كومپانيانىڭ ءوز تاۋار تاڭبالارىنىڭ زاڭسىز پايدالانىلعانى تۋرالى رەسمي ءوتىنىشى نەگىز بولدى. ناتيجەسىندە قالاداعى بىرنەشە بازار مەن قويمادان ءتۇپنۇسقاعا ۇقساس جالعان كونسترۋكتورلاردىڭ پارتيالارى انىقتالدى. بارلىعى 2 ميلليون تەڭگەدەن استام سومماعا 1 مىڭنان اسا جالعان ءونىم تاركىلەندى.

- كونترافاكت تەك برەندتەردىڭ قۇقىقتارىن بۇزىپ قانا قويمايدى، ەڭ الدىمەن تۇتىنۋشىلارعا، اسىرەسە بالالارعا ارنالعان تاۋارلار تۋرالى بولعاندا، تىكەلەي ءقاۋىپ توندىرەدى. مۇنداي ونىمدەر ۋلى، ساپاسىز نەمەسە جاراقات كەلتىرۋى مۇمكىن. ءبىز وسىنداي قۇقىق بۇزۋشىلىقتاردىڭ جولىن كەسۋ بويىنشا جۇمىستى كۇشەيتۋدەمىز، – دەدى الماتى قالاسى پد كيبەرقىلمىسقا قارسى كۇرەس باسقارماسى باستىعىنىڭ ورىنباسارى ەركەبۇلان قويشىبايەۆ.

تاركىلەنگەن تاۋارلار ساپاسىز، تاڭبالانباي، ءوندىرۋشى تۋرالى اقپاراتسىز بولعان. بىرلەسكەن ءىس-شارالاردىڭ قورىتىندىسى بويىنشا جينالعان ماتەريالدار سوتقا جولداندى.


ۇسىنىلعان
سوڭعى جاڭالىقتار