27 قىركۇيەك كۇنى تاڭەرتەڭ الماتى قالاسى الاتاۋ اۋدانى سامعاۋ شاعىناۋدانىندا ءورت وقيعاسى تىركەلدى. ساعات 08:30-دا ۇلان كوشەسىندەگى جەكە تۇرعىن ءۇيدىڭ ورتەنگەنى جونىندە تجد-عا تۇرعىنداردان ءتورت حابارلاما تۇسكەن، دەپ حابارلايدى Dalanews.kz.
"وقيعا ورنىنا الماتى قالاسى توتەنشە جاعدايلار دەپارتامەنتىنىڭ كۇشتەرى مەن تەحنيكاسى جەدەل جىبەرىلدى. قىزىل جالىن شارۋاشىلىق قۇرىلىستاردى، ءبىر قاباتتى تۇرعىن ءۇيدى جانە ۋاقىتشا سالىنعان نىسانداردى شارپىعان"، - دەلىنگەن حابارلامادا.
ءورتتى ءسوندىرۋ جۇمىستارىن عيماراتتاردىڭ تىعىز ورنالاسۋى مەن اعاش ماتەريالدارىنىڭ كوپتىگى قيىنداتقان. بۇل كورشى ۇيلەرگە وتتىڭ تارالۋ ءقاۋپىن كۇشەيتكەن. دەگەنمەن، ءورت سوندىرۋشىلەردىڭ جەدەل ارەكەتىنىڭ ارقاسىندا جانعان اۋماقتاعى شارۋاشىلىق قۇرىلىسىنىڭ ءبىر بولىگى مەن كورشىلەس تۇرعىن ۇيلەردى امان ساقتاپ قالۋ مۇمكىن بولدى.
"ءورت 250 شارشى مەتر اۋماقتى شارپىعان. ءورت ساعات 09:23-تە وقشاۋلانىپ، 09:36-دا تولىق ءسوندىرىلدى. زارداپ شەككەندەر تۋرالى اقپارات جوق"، - دەدى الماتى قالاسى تجد.
