بۇرىنعى دەپۋتاتتىڭ ۇلىنا قاتىستى قىلمىستىق ءىس الماتى سوتىنىڭ قاراۋىنا جىبەرىلدى. ول بىلتىر ناۋرىزدا الماتىداعى "مەركۋر تاۋەرس" تۇرعىن ءۇي كەشەنىنىڭ كۇزەتشىسىن بىرنەشە رەت كولىگىمەن قاعىپ، سوققىعا جىققان، - دەپ حابارلايدى Dalanews.kz قالالىق سوتتىڭ باسپا ءسوز قىزمەتىنە سىلتەمە جاساپ.
"الماتى قىلمىستىق ىستەر جونىندەگى مامانداندىرىلعان اۋدانارالىق سوتىنا قازاقستان رەسپۋبليكاسى قىلمىستىق كودەكسىنىڭ 99-بابى 2-بولىگى 5) تارماعى ("اسا قاتىگەزدىكپەن جاسالعان ادام ءولتىرۋ") جانە 147-بابى 5-بولىگى ("ادامنىڭ جەكە ءومىرى تۋرالى مالىمەتتەردى ونىڭ كەلىسىمىنسىز تاراتۋ") بويىنشا سوتقا بەرىلگەن ت.-عا قاتىستى قىلمىستىق ءىس كەلىپ ءتۇستى. ءبىرىنشى ەپيزود بويىنشا سوتتالۋشى 2024 جىلدىڭ ناۋرىزىندا الماتىداعى تۇرعىن ءۇي كەشەندەرىنىڭ ءبىرىنىڭ كۇزەتشىسىن ءولتىردى دەپ ايىپتالىپ وتىر"، – دەلىنگەن حابارلامادا.
سونىمەن قاتار، تەرگەۋ سوتتالۋشىعا ءوزىنىڭ تانىسى ا.-نىڭ قاتىسۋىمەن تۇسىرىلگەن پورنوگرافيالىق بەينەماتەريالداردى الەۋمەتتىك جەلىلەر ارقىلى تاراتتى دەگەن ايىپ تاعىپ وتىر. قازىرگى ۋاقىتتا سوت وتىرىسىنىڭ ۋاقىتى بەلگىلەنبەگەن.
ەسكە سالايىق، جول تالعامايتىن كولىگىمەن كۇزەتشىنى بىرنەشە رەت قاعىپ، كەيىن كولىگىنەن ءتۇسىپ ونى سوققىعا جىققان ەر ادامنىڭ ارەكەتى ۆيدەوعا ءتۇسىپ قالعان بولاتىن. كۇزەتشى اۋىر جاعدايدا اۋرۋحاناعا جەتكىزىلىپ، سول جەردە كوز جۇمدى.
