2025 جىلى توعىز ايدىڭ ٸشٸندە الماتىدا توزىعى جەتكەن ٷيلەردٸڭ 390 يەسٸ جاڭا, جايلى جاعداي جاسالعان پەتەرگە كٶشتٸ. كٶشٸرۋ جۇمىستارىن «الماتى قالاسى ەكٸمدٸگٸنٸڭ كاپيتالدىق قۇرىلىس كەسٸپورنى» جەنە «الماتى» ەكك كومپانيياسى مەن ينۆەستور «الماتى قالاسىنىڭ تۇرعىن ٷيدٸ جاڭارتۋ باعدارلاماسى – 2030» اياسىندا جٷزەگە اسىرىپ وتىر, دەپ حابارلايدى Dalanews.kz
پەتەر يەلەرٸ جاڭا تۇرعىن ٷيدٸ «بٶلمە-بٶلمەگە» قاعيداتى بويىنشا نەمەسە بۇرىنعى مٷلكٸنٸڭ نارىق باعاسىنا ساي اقشالاي ٶتەم تٷرٸندە الدى. باعدارلاما اياسىنداعى بارلىق پەتەر تازا ەرلەۋمەن تاپسىرىلۋدا. وندا ينتەرنەت جەلٸسٸ تارتىلعان, ٶرت دابىلى, سانيتارلىق جابدىقتار, فايانس بۇيىمدارى, سونداي-اق گاز نەمەسە ەلەكتر پليتالارى ورناتىلعان.
9 اي ٸشٸندە ەڭ كٶپ تۇرعىن تٷركسٸب اۋدانىندا – 127 ادام, جەتٸسۋ اۋدانىندا – 107, المالىدا – 58, الاتاۋدا – 42, ەۋەزوۆتە – 26, مەدەۋدە – 18, بوستاندىق اۋدانىندا – 12 ادام جاڭا باسپاناعا كٶشتٸ.
باعدارلاما اياسىندا جىل باسىنان بەرٸ الماتىدا 12 ەسكٸ ٷي بۇزىلدى, جىل سوڭىنا دەيٸن تاعى التى نىساندى سٷرۋ جوسپارلانعان. قونىستاندىرۋ مەن سٷرۋ جۇمىسى تەك مەنشٸك يەلەرٸنٸڭ كەلٸسٸمٸمەن جٷرگٸزٸلەدٸ.
ارنايى قاجەتتٸلٸگٸ بار تۇرعىندار ٷشٸن بٸرٸنشٸ قاباتتان نەمەسە جەدەلساتى, پاندۋسى مەن كەدەرگٸسٸز كٸرۋ جٷيەسٸ بار ٷيلەردەن پەتەرلەر قاراستىرىلعان. قالا قاۋٸپسٸزدٸگٸن قامتاماسىز ەتۋ ماقساتىندا كاركاس-قامىستى قۇرىلىستار مەن سەيسميكالىق بەلسەندٸ ايماقتارداعى عيماراتتاردى بۇزۋعا ەرەكشە نازار اۋدارىلىپ وتىر.
ۇسىنىلعان نۇسقالاردان باس تارتقان مەنشٸك يەلەرٸ ٶز ٷيلەرٸندە تۇرا بەرۋ قۇقىعىن ساقتايدى, الايدا مۇنداي جاعدايدا ٶمٸر سٷرۋ تەۋەكەلٸ ٷشٸن جاۋاپكەرشٸلٸكتٸ ٶزدەرٸ كٶتەرەدٸ.
جىل سوڭىنا دەيٸن كاپيتالدىق قۇرىلىس كەسٸپورنى مەن ينۆەستورلار قونىس اۋدارعان تۇرعىندار سانىن 667 ادامعا دەيٸن جەتكٸزۋدٸ جوسپارلاپ وتىر.
«جاڭارتۋ باعدارلاماسى ارقىلى تۇرعىنداردىڭ ٶمٸر ساپاسىنىڭ جاڭا دەڭگەيٸ قالىپتاسۋدا: جايلى جاعداي, زاماناۋي قالالىق ورتا, قوعامدىق كەڭٸستٸك پەن جاڭا قىزمەت تٷرلەرٸ پايدا بولىپ وتىر. وسى ارقىلى مەگاپوليستٸڭ سەۋلەتتٸك كەلبەتٸ جاڭارىپ, تۇرعىندار قاۋٸپسٸز ەرٸ جايلى پەتەرلەرگە قول جەتكٸزٸپ كەلەدٸ. 2030 جىلعا دەيٸن توزىعى جەتكەن ٷيلەردٸڭ سانىن 1366-دان 690-عا دەيٸن ازايتىپ, شامامەن 7 500 مەنشٸك يەسٸن كٶشٸرۋ جوسپارلانىپ وتىر», — دەدٸ «كاپيتالدىق قۇرىلىس كەسٸپورنىنىڭ» باسقارما تٶراعاسى رينات قۇرمانوۆ.
ەسكە سالايىق, «الماتى قالاسىنىڭ تۇرعىن ٷيدٸ جاڭارتۋ باعدارلاماسى – 2030» جوباسىن قالا ەكٸمدٸگٸ ەزٸرلەپ, 2024 جىلدىڭ قاراشاسىندا مەسليحات بەكٸتكەن. باعدارلامانىڭ ەكٸمشٸسٸ – «الماتى» ەكك» اق, ال ۋەكٸلەتتٸ ۇيىم – «الماتى قالاسى ەكٸمدٸگٸنٸڭ كاپيتالدىق قۇرىلىس كەسٸپورنى» جشس.
