الماتى قالاسى 2025–2026 جىلداردىڭ قىسقى كەزەڭىنە تولىق دايىندالۋدا. قالا اكىمدىگى مەن توتەنشە جاعدايلار دەپارتامەنتى تابيعي جانە تەحنوگەندىك سيپاتتاعى ىقتيمال قاۋىپتەردىڭ الدىن الۋ ءۇشىن كەشەندى جۇمىستار جۇرگىزۋدە، دەپ حابارلايدى Dalanews.kz.

الماتى قالاسىنىڭ تجد حابارلاۋىنشا، بۇگىندە قىس مەزگىلىندە بولۋى مۇمكىن توتەنشە جاعدايلاردىڭ سالدارىن جويۋعا 48 مىڭنان استام ادام، قۇتقارۋ تەحنيكالارى مەن ارنايى قۇرالدار دايىن تۇر. بۇل توپتىڭ قۇرامىنا:

• ازاماتتىق قورعانىس كۇشتەرى،

• جەدەل-قۇتقارۋ جاساقتارى،

• كوممۋنالدىق قىزمەتتەر،

• ەنەرگەتيكا، جول، مەديسينا جانە وزگە دە سالا ماماندارى كىرەدى.

ماماندار قىستا ءجيى كەزدەسەتىن قاۋىپتەر – قار قۇرساۋىندا قالۋ، كوشكىن، سۋىقتان بولاتىن اپاتتار، جىلۋ جۇيەلەرىندەگى اقاۋلار سياقتى جاعدايلارعا جەدەل ارەكەت ەتۋگە ءازىر.

قالالىق دەڭگەيدەگى وقۋ-جاتتىعۋ: 9 سەناريي بويىنشا دايىندىق

7 قاراشا كۇنى الماتىدا اۋقىمدى كوماندالىق-شتابتىق وقۋ-جاتتىعۋ ءوتتى. جاتتىعۋ بارىسىندا توتەنشە جاعدايلاردا كۇشتەردىڭ ءوزارا ارەكەتتەسۋ الگوريتمدەرى تەكسەرىلدى.

تاكتيكالىق جوسپار اياسىندا بارلىعى 9 وقۋ سەنارييى ورىندالدى. ولاردىڭ ىشىندە:

• جەو-داعى شارتتى اپاتتى جويۋ،

• اۆاريالىق جىلۋمەن قامتۋ جۇيەسىن ىسكە قوسۋ،

• زارداپ شەككەندەردى قابىلداۋ پۋنكتىن ورنالاستىرۋ،

• «شىمبۇلاقتا» قۇتقارۋ جۇمىستارىن جۇرگىزۋ،

• قار كوشكىنىنىڭ استىندا قالعان ادامدى ىزدەۋ.

بۇل جاتتىعۋلار توتەنشە جاعداي كەزىندە ءتۇرلى قىزمەتتەردىڭ ۇيلەسىمدى جۇمىس ىستەي الاتىنىن كورسەتتى.

الماتى تاۋلارىندا 165 كوشكىن ءقاۋپى بار ايماق بار

الماتى قالاسى تجد مالىمەتىنشە، قالاعا قاراستى تاۋلى ايماقتاردا 165 قار كوشكىنى ءجۇرۋى مۇمكىن ۋچاسكە انىقتالعان. ونىڭ 33ء-ى – اسا ءقاۋىپتى. ءقاۋىپتىڭ الدىن الۋ ءۇشىن:

• «قازگيدرومەت» كۇن سايىن داۋىلدى ەسكەرتۋلەر جاريالاپ، تۇرعىنداردى اقپاراتتاندىرادى؛

• رەسپۋبليكالىق “قازسەلدەنقورعاۋ” مەكەمەسى قىس بويى كوشكىننىڭ پروفيلاكتيكالىق ءتۇسىرىلۋىن قامتاماسىز ەتەدى؛

• تاۋلى ايماقتارداعى ءقاۋىپ دەڭگەيى تۇراقتى باقىلاۋدا.

جىلۋ جۇيەلەرى - ەرەكشە باقىلاۋدا

قىس باستالعاننان بەرى قالانىڭ جىلۋمەن قامتاماسىز ەتۋ نىساندارىنا باقىلاۋ كۇشەيتىلگەن. ماماندار جىلۋ جەلىلەرىنىڭ تەحنيكالىق جاعدايىن تەكسەرىپ، اقاۋلاردىڭ الدىن الۋ شارالارىن اتقارۋدا. جەو-لاردا جانە ماگيسترالدىق قۇبىرلاردا مونيتورينگ جۇيەلى تۇردە جۇرگىزىلىپ كەلەدى.

تۇرعىنداردىڭ قاۋىپسىزدىك مادەنيەتىن ارتتىرۋ - باستى مىندەت

الماتى قالاسى تجد-نىڭ باسىم باعىتتارىنىڭ ءبىرى – ازاماتتاردىڭ قاۋىپسىزدىك بويىنشا ءبىلىمىن ارتتىرۋ. دەپارتامەنت جۇيەلى تۇردە:

• مەكتەپتەر مەن جوعارى وقۋ ورىندارىندا ساباقتار وتكىزەدى،

• وقىتۋ ترەنينگتەرىن ۇيىمداستىرادى،

• تۇرعىندارعا تج كەزىندەگى دۇرىس ارەكەت ەتۋ ەرەجەلەرىن تۇسىندىرەدى.

قىسقى كەزەڭدە مۇنداي ءبىلىمنىڭ اسا ماڭىزدى ەكەنىن ماماندار ەرەكشە اتاپ وتەدى. سەبەبى قارلى بوران، كوكتايعاق، گازبەن ۋلانۋ، كوشكىن سياقتى قاۋىپتەر جيىلەيدى.