ىلە-الاتاۋ تاۋلارىنىڭ وڭتۇستىك بەتكەيىندە 55 كوشكىن ءقاۋپى بار ۋچاسكە انىقتالدى. ءقاۋىپ الماتى وبلىسىنىڭ ەڭبەكشىقازاق، تالعار جانە قاراساي اۋداندارىندا ورنالاسقان، دەپ حابارلايدى Dalanews.kz.
الماتى وبلىسىنىڭ توتەنشە جاعدايلار دەپارتامەنتى تۇرعىندار مەن قوناقتارعا قار باسقان بەتكەيلەرگە شىقپاۋعا جانە تاۋلى ايماقتاردا قاۋىپسىزدىك شارالارىن ساقتاۋعا شاقىرادى.
"2-5 جەلتوقسان ارالىعىندا كوشكىن ءجۇرۋ ءقاۋپى بار ەكەندىگىن اتاپ وتكەن تجد وكىلدەرى ازاماتتاردان، تۋريستەر مەن دەمالۋشىلاردان قارلى بەتكەيلەرگە شىقپاۋىن جانە تاۋلى جەرلەردە قاۋىپسىزدىك ەرەجەلەرىن قاتاڭ ساقتاۋلارىن سۇرايدى. قار كوشكىنى كوبىنە تەمپەراتۋرانىڭ جوعارىلاۋى، سونداي-اق قار مەن جاڭبىر تۇرىندەگى مول جاۋىن-شاشىننىڭ اسەرىنەن بولۋى مۇمكىن"، دەپ ءتۇسىندىردى Baq.kz اگەنتتىگىنە الماتى وبلىسى تجد رەسمي وكىلى ايگەرىم قانابەك قىزى.
